काठमाडौं । नेपाली कांग्रेसका केन्द्रीय सदस्य रामहरि खतिवडाले सामाजिक सञ्जालमा नेताहरूलाई गालीगलौज गरेर अपमानको राजनीति नगर्न आग्रह गरेका छन्् ।

सामाजिक सञ्जाल एक्समार्फत नेता खतिवडाले मुलुक संकटमा रहेका बेला कांग्रेसले नेतृत्वदायी भूमिका निभाएर अगाडि बढ्नुपर्ने बताए । पार्टीभित्र विभिन्न विचारहरू राख्दा सामाजिक सञ्जालमा कसैलाई देवता बनाउने र कसैलाई राक्षस बनाउने कार्यको विरोध गरेका छन् ।

कांग्रेसको १५औँ महाधिवेशन नियमित गर्नका लागि सबैले जिम्मेवार बनेर भूमिका खेल्न नेता खतिवडाले आग्रह गरेका छन् ।

‘नपाली कांग्रेस पार्टीमा एक भएको सन्देश सहित नियमित महाधिवेशन गराउन एकताबद्ध भएर लागौं,’ खतिवडाले लेखेका छन्, ‘सामाजिक सञ्जालमा नेतालाई देउता र राक्षस बनाउन नलागौं कसैलाई राम्रो हुँदैन ।’

उनले भने, ‘अब हामी तत्काल मिलेर समग्र देश मिलाउन लागौं नत्र हामीसँग पछुताउनुपर्ने अवस्था हुन्छ । मभन्दा देश र जनतालाई ठूलो मानौं ।’

कांग्रेस महामन्त्रीद्वय गगन थापा र विश्वप्रकाश शर्माले विशेष महाधिवेशनको नाममा केन्द्रीय कार्यसमितिमा लफडा गर्दै आएका छन् । महामन्त्री थापाका समर्थकहरू अर्थात् साइबर सेनाले फरक बिचार राख्ने नेता तथा कार्यकर्ताहरूको चरित्रहत्या हुने गरेर लेख्ने, तस्बिर बनाउने लगायतका गतिविधि गर्दै आएका छन् ।