काठमाडौं । नेपाल प्रहरीले स्थापना दिवसको अवसरमा गैरआवासीय नेपाली संघ एनआरएनए अन्तर्राष्ट्रिय समन्वय परिषदका अध्यक्ष महेशकुमार श्रेष्ठलाई सम्मान गरेको छ ।

शुक्रबार प्रहरी प्रधान कार्यालय, नक्सालमा आयोजित ७०औं स्थापना दिवसको विशेष समारोहमा प्रहरी महानिरीक्षक (आईजीपी) चन्द्रकुबेर खापुङ्गले अध्यक्ष श्रेष्ठलाई सम्मान गरेका हुन् ।

भदौ २३–२४ को जेनजी आन्दोलनका क्रममा क्षतिग्रस्त बनेको उपत्यका ट्राफिक प्रहरी कार्यालय बग्गीखानाको पुनर्निर्माणमा एनआरएनएले सहयोग गरेकाले सम्मान गरिएको प्रहरी प्रधान कार्यालयले जनाएको छ ।

आईजीपी खापुङ्गले कदर प्रत्र प्रदान गरेका थिए । अध्यक्ष श्रेष्ठले सडक सुरक्षाका लागि एनआरएनएले योगदान गरेको बताउँदै आउँदा दिनमा पनि आवश्यकताका आधारमा सहयोग गर्ने बताए ।

एनआरएनएले अहिले ट्राफिक कन्ट्रोलरुम पुनर्निर्माणको काम अन्तिम चरणमा पु¥याएको छ । निर्माणका लागि करिब ८० लाख बढी लागत लाग्ने अनुमान गरिएको छ । उपत्यका ट्राफिक कन्ट्रोल रुममा आवश्यक पर्ने उपकरणहरु जोड्ने काम भइरहेको एनआरएनए उपाध्यक्ष मनोजकुमार श्रेष्ठले जानकारी दिए ।

विपद् व्यवस्थापन समितिका संयोजकसमेत रहेका मनोजकुमार श्रेष्ठले काम अन्तिम चरणमा पुगेको र केही दिनमै ट्राफिक प्रहरीलाई हस्तान्तरण गर्ने बताए ।

सम्मान समारोहमा एनआरएनएका पूर्व अध्यक्षहरू विनोद कुँवर, राजेन्द्रकुमार शर्मा, पूर्व महासचिव जानकी गुरुङ, वर्तमान कार्यसमिति उपाध्यक्ष मनोजकुमार श्रेष्ठ, विश्वदीप तिगेला, महासचिव बाबुराम लामा, सचिव तिलक गैरे, महिला संयोजक रश्मी थापा, युवा संयोजक भीमसेन थापा, युवा उद्यमी नारायण भण्डारी (समाजसेवी), विपद् व्यवस्थापन समितिका सदस्यसचिव धर्मराज गिरी, एनआरएनएका कार्यकारी निर्देशक रविकिरण अधिकारी, सञ्चारकर्मी विवश काफ्लेको उपस्थिति रहेको थियो ।