वीरगञ्ज । पर्साको वीरगञ्ज, भानुचोकस्थित एक होटलमा दुई जना भारतीय नागरिक मृत फेला परेका छन् ।

होटल शाह पाराडाइजमा पश्चिम भुवनम बस्ने ६७ वर्षीय सजल अचार्जी र २४ वर्षीय सागर अचार्जी मृत भेटिएका हुन् । पश्चिम भुवनम भारतको त्रिपुरा राज्यको पश्चिम त्रिपुरा जिल्लामा पर्ने एउटा गाउँ हो ।

उनीहरूले होटलमा पेस गरिएको विवरण अनुसार उनीहरू बाबुछोरा हुन् । होटल सञ्चालक भरत शाहका अनुसार अचार्जी बाबुछोरा असोज १९ गतेदेखि होटलमा बसिरहेका थिए ।

उनीहरू काठमाडौंबाट आएका थिए । कलकत्ता जाने तयारीमा थिए । सोमबार दिउँसो कोठामै खाना मगाएर खाएका उनीहरूले त्यसपछि खाना मगाएका थिएनन् ।

खाना खान नआएपछि होटल प्रशासनले उनीहरूको खोजी सुरू गरेको थियो । कोठामा भित्रबाट चुकुल लगाएका उनीहरू लामो समय बाहिर नआएपछि प्रहरीलाई खबर गरिएको थियो ।

अर्को कोठाको भेन्टिलेसनबाट चिहाएर हेर्दा एक जना झुन्डिएको र एक जना खाटमा उत्तानो परेर सुतेको अवस्थामा देखिएको प्रहरीले जनाएको छ ।