काठमाडौं । गैरआवासीय नेपाली संघ (एनआरएनए) का अध्यक्ष महेशकुमार श्रेष्ठले संस्थापक अध्यक्ष उपेन्द्र महतोसँग भेट गरेका छन् ।

भदौ २३–२४ को जेनजी आन्दोलनकारीले काठमाडौंमा रहेको महतोको घरलाई जलाएर ध्वस्त बनाएका छन् । बधुबार भेटेर अध्यक्ष श्रेष्ठले महतोको निजी सम्पत्तिमाथि भएको आक्रमण सम्पूर्ण एनआरएनमाथिको आक्रमण भएको बताए ।

एनआरएनबीचको एकता कमजोर हुँदा सबैतिरबाट आक्रमण भइरहेको भन्दै सबैलाई एकताबद्ध हुन अध्यक्ष श्रेष्ठले आग्रह गरेका छन् । उनले भने, ‘तपार्ईंको निवासमा गरिएको दुष्कृत्य केवल तपाईं र तपाईंको परिवारमाथि प्रत्यक्ष आक्रमण मात्र थिएन, यो देशभित्र र विदेशमा रहेका प्रत्येक नेपालीको सम्मान, सुरक्षा र आशामाथि गरिएको हमला पनि हो ।’

आक्रमणले एनआरएन समुदायका हरेक सदस्यको मनमा गहिरो चोट पुर्‍याएको उल्लेख गर्दै अब बलियो एकताको सङ्कल्पका साथ अघि बढ्नु पर्नेमा अध्यक्ष श्रेष्ठले बताएका छन् ।

नेपालमा सुरक्षा अवस्था कमजोर रहेको सन्देश गएको र यसले लगानी भित्र्याउन नकारात्मक असर पर्ने भन्दै यसका लागि सरकारले गम्भीर रूपमा समीक्षा गर्नु पर्नेमा अध्यक्ष श्रेष्ठले बताए ।

एनआरएनएका पूर्व अध्यक्ष डा.शेष घलेले उक्त घटना दुखद् भएको बताउँदै हिम्मत नहार्न हौसला प्रदान गरेका छन् । संस्थागतरुपमै सबै मिलेर नेपालको आर्थिक विकासका लागि पनि एनआरएनए केन्द्रित हुनुपर्नेमा उनले बताए ।

एनआरएनए अभियन्ता आरके शर्माले एकताबद्ध एनआरएन बनाएर सबै अघि बढेमा आगामी दिनमा कसैले पनि एनआरएनहरूमाथि हमला गर्न नसक्ने बताए । उनले हामी केही लिन नभएर केही दिनको लागि मातृभूमिको सेवामा जुटी रहेका छौँ भन्दै यो कुरा बुझी दिन सबै नेपालीलाई आग्रह पनि गरेका छन् ।

संस्थापक अध्यक्ष महतोले आफूले सधैँ नेपालको उन्नति होस् भनेर यतै लगानी गरेको बताउँदै यस्तो घटनाबाट पाठ सिकेर अघि बढ्नु पर्ने बताए । उनले आफू व्यक्तिलाई भन्दा पनि एनआरएनलाई कमजोर पार्ने मानसिकताबाट उक्त आक्रमण गरिएको बताए ।

महतोले आफ्नो घरमा क्षति गर्नेहरू जेनजी नभएको बताउँदै लुटेराहरूको पहिचान गरेर कारबाही गर्नु पर्ने बताए । महतोले भने, ‘यस पटक ममाथि आक्रमण भयो, अर्को पटक अरू साथीहरूलाई नहोस्, म नै पहिलो र अन्तिम हुन चाहन्छु ।’

एनआरएनए उच्चस्तरीय समितिकी सदस्य सचिव जानकी गुरुङ, एनआरएन उपाध्यक्ष खगेन्द्र न्यौपाने, महिला संयोजक रश्मी थापा, युवा संयोजक भीमसेन थापा, अनुसन्धान संयोजक दीपेश खत्री, सदस्यसचिव धर्मराज गिरी, विपद् व्यवस्थापन समितिका सदस्य निरञ्जन भण्डारी, नीराजन खत्री लगायतको उपस्थिति थियो ।