काठमाडौं । वैदेशिक रोजगारीमा आकर्षक तलबको प्रलोभनमा पारी युके र लिथुआनिया पठाइदिन्छु भन्दै रकम ठगी गरेको अभियोगमा ३ जनालाई प्रहरीले पक्राउ गरेको छ ।

मंगलबार पक्राउ पर्नेहरूमा काठमाडौं महानगरपालिका–३२ बस्ने धनुषाको जनकपुरधाम उपमहानगरपालिका–४ घर भएकी २६ वर्षीया सुजनीकुमारी साह, काठमाडौं महानगरपालिका–३ बस्ने सुनसरीको धरान उपमहानगरपालिका–३ घर भएका ३४ वर्षीय दीपककुमार उदास र भक्तपुरको चाँगुनारायण नगरपालिका–१ बस्ने २३ वर्षीया रेशिका हमाल न्यौपाने रहेको विज्ञप्तिमा उल्लेख छ ।

पक्राउमध्ये सुजनी कुमारीले युके पठाइदिन्छु भन्दै १ जना पीडितबाट १७ लाख ४ हजार रूपियाँ, दीपककुमारले युके पठाइदिन्छु भन्दै १ जना पीडितबाट २ लाख ३४ हजार रूपियाँ र रेशिकाले लिथुआनिया पठाइदिन्छु भन्दै २ जना पीडितहरूबाट ६ लाख ८ हजार रूपियाँ लिई सम्पर्कबिहीन भएका थिए ।

पीडितहरूको उजुरीको आधारमा काठमाडौं उपत्यका अपराध अनुसन्धान कार्यालय, टेकुबाट खटिएको प्रहरीले सुजनीकुमारी र रेशिकालाई काठमाडौं महानगरपालिका–३२ बाट तथा दीपककुमारलाई काठमाडौं महानगरपालिका– १२ बाट पक्राउ गरेको विज्ञप्तिमा उल्लेख छ ।

उनीहरूलाई आवश्यक अनुसन्धान तथा कारवाहीको लागि वैदेशिक रोजगार विभाग ताहाचल काठमाडौं पठाइएको छ ।