काठमाडौं । परराष्ट्रमन्त्री डा.आरजु राणा र ओमानका विदेशमन्त्री सय्यद बद्र बिन हमद बिन हमूद अलबुसाइदीबीच भेटवार्ता भएको छ ।

सोमबार ओमानको मस्कटमा डा.राणा र अलबुसाइदीबीच द्विपक्षीय भेटवार्ता भएको हो । आठौँ हिन्द महासागर सम्मेलन सफलतापूर्वक सम्पन्न गरेकामा ओमानका विदेशमन्त्री अलबुसाइदीलाई डा.राणाले बधाई दिएकी छिन् ।

नेपाल–ओमान सम्बन्धका विविध पक्षका साथै दुई देशबीचका विभिन्न क्षेत्रहरूमा सहकार्यको प्रवर्द्धनका उपायहरूका बारेमा पनि छलफल भएको छ ।

परराष्ट्रमन्त्री डा.राणाले नेपालमा दूतावास स्थापना गर्न तथा ओमान–काठमाडौं सीधा हवाई उडान सुरु गर्न ओमान सरकारसँग आग्रह गरेकी छिन् ।

नेपाल र ओमानबीच कूटनीतिक अध्ययन र तालिमका क्षेत्रहरूमा सहकार्य गर्ने सम्बन्धी समझ्दारीपत्रमा पनि हस्ताक्षर भएको छ ।

सम्झौताले कूटनीतिक तालिम र कूटनीतिक क्षेत्रका सूचना आदानप्रदानमा सहकार्य गर्ने अवसर प्रदान गर्नेछ ।