ललितपुर । ललितपुर जिल्ला ब्याडमिन्टन संघको आयोजना तथा बालकुमारी रिमिक्स क्लबको सहआयोजनामा तेश्रो ललितपुर मेयर कप राष्ट्रिय ब्याडमिन्टन प्रतियोगिता २०८१ ललितपुरमा सुरु भएको छ ।

मंगलबारदेखि ललितपुर महानगरपालिकाको मुख्य प्रायोजन रहेको प्रतियोगिताको प्रमुख अथिति ललितपुर महानगरपालिकाका मेयर चिरीबाबु महर्जन र भेट्रान खेलाडी कुमारमोहन बहादुर शाहीले संयुक्त उद्घाटन गरेका छन् ।

ललितपुर जिल्ला ब्याडमिन्टन संघका अध्यक्ष गोपाल महर्जनको अध्यक्षतामा भएको उद्घाटन कार्यक्रममा ललितपुर जिल्ला खेलकुद विकास समितिका अध्यक्ष विनोद महर्जन, नेपाल ब्याडमिन्टन संघका पूर्व अध्यक्ष प्रकाशबहादुर शाही, संघका महासचिव वीरेन्द्र श्रेष्ठ, सहमहासचिव नवीनविक्रम शाह लगायतको उपस्थिति रहेको थियो ।

विशाल र भोजको विजयी सुरुवात

नेपाल ब्याडमिन्टन संघको वरीयता प्राप्त प्रतियोगिताको पुरुष एकलतर्फको खेलमा भोजपुरका विशाल तामाङ्ग र एपीएफका भोजबहादुर गुरुङ्गले विजयी सुरुवात गरेका छन् । तामाङ्गले नेपाल पुलिसका हीराबहादुर राईलाई २१–१७, २१–५ र गुरुङ्गले ललितपुरका सुविन श्रेष्ठ (ए) लाई २१–११, २१–११ को समान अन्तरले पराजित गर्दै दोश्रो चरणमा प्रवेश गरे ।

सहआयोजक बालकुमारी रिमिक्स क्लबको आफ्नै कभर्डहलमा भएको प्रतियोगिताको पुरुष एकलतर्फनै कैलालीका शिषिर रानाले दार्चुलाका पप्पु पाललाई २१–१०, २१–१४ र युनिटी ब्याडमिन्टन एकेडेमीका सुनिल कार्कीले महोत्तरीका इशान झालाई २२–२०, २०–२२, २१–१३ ले पराजित गरे ।

एपीएफका क्षितिज खनालले युनिटी ब्याडमिन्टन एकेडेमीका नरेन्द्र बमलाई २१–१५, २१–१८, सेनाका सौर्य महर्जनले गार्खाका मुकुल गुरुङ्गलाई २१–१३, २१–१६, पुलिसका पूर्णबहादुर थापाले काभ्रेका अंकित भोछिभ्वयलाई २१–१२, २१–९, एपीएफका संक्षम ढकालले कठायत ब्याडमिन्टन ट्रेनिङ्ग सेन्टरका प्रदीप सोतीलाई २१–१७, २१–१७, सेनाका सुविन श्रेष्ठले पदम युवा समाजका सफलराज पाण्डेबाट वाक ओभर, सेनाका लक्ष्मण राना मगरले सीतापाखा ब्याडमिन्टन क्लबका जोन जसराजलाई २१–२३, २१–१८, २१–१५, एपीएफका रोशन साउदले देवीनगर ब्याडमिन्टन क्लबका गौरव तन्डुकारलाई २१–९, २१–८, युनिटी ब्याडमिन्टन एकेडेमीका प्रियान्सु श्रेत्रीले सल्यानका निराजन चन्दबाट वाकओभर र कठायत ब्याडमिन्टन ट्रेनिङ्ग सेन्टरका अमन डङ्गोलले दार्चुलाका आयुष पाललाई २१–१०, २१–१३ ले पराजित गर्दै दोश्रो चरणमा प्रवेश गरे ।

एपीएफका अनिल मल्लले लम्जुङ्गका सुजन थापालाई २१–११, २०–२२, २१–१०, बागलुङ्गका प्रकाश सापकोटाले सुनाकोठी ब्याडमिन्टन क्लबका युनीष महर्जजनलाई २१–११, २१–८, पुलिसका कवीर केसीले एपीएफका अमन महर्जनलाई २१–९, १५–२१, २२–२०, सेनाका सुप्रिम पन्तले एपीएफका अरुण अधिकारीलाई २१–१०, २१–१३, सेनाका विवेक चौधरीले देवीनगर ब्याडमिन्टन क्लबका नरेन्द्र लिम्बुलाई २१–१९, २१–१९ ले र गारखाका सन्वित जोशीले काभ्रेका महेश कार्कीलाई २१–९, २१–१९ ले पराजित गर्दै दोश्रो चरणमा स्थान पक्का गरे ।

प्रतियोगितामा पुरुष एकल, महिला एकल, पुरुष युगल (शीर्ष २० बरियता बाहेक), यु–१७ ब्वाईज र गर्ल्स तथा मास्टर ४५ माथि युगल गरि ६ बिधामा प्रतिस्पर्धा हुनेछ ।

३१ लाख अनुमानित लागत रहेको प्रतियोगितामा पुरुष तथा महिला एकल र पुरुष युगलतर्फका विजयीले नगद ४० हजारका साथ मेडल, ट्रफी र प्रमाणपत्र प्राप्त गर्नेछन् । दोश्रो हुनेले नगद २० हजार र तेश्रो स्थान प्राप्त गर्नेले नगद १० हजारका साथ मेडल, ट्रफी र प्रमाणपत्र प्राप्त गर्नेछन् ।

यु–१७ तर्फ ब्वाईज तथा गर्ल्स एकलमा प्रथम द्वितीय र तृतीय हुनेले नगद २० हजार, १० हजार र ५ हजारका साथ मेडल, ट्रफी र प्रमाणपत्र तथा मास्टर युगल (४५ वर्षमाथि)का प्रथम, द्वितीय र तृतीय हुनेले नगद ३० हजार, १५ हजार र ७ हजार ५ सय सहित मेडल, प्रमाणपत्र र ट्रफी प्राप्त गर्नेछन् ।

५ दिनसम्म संचालन हुने प्रतियोगितामा तीन विभागीय टोली, क्लब र जिल्लाका गरि २२८ खेलाडीहरूले विभिन्न ६ विधामा प्रतिस्पर्धा गर्नेछन् ।