रुकुम पश्चिमकी जुमनाको काइकेमा मृत्यु

आठबिसकोट । रूकुम पश्चिम जिल्लाकी २२ वर्षीया युवती जमुना विष्टको डोल्पामा मृत्यु भएको छ ।

सोमबार डोल्पाको काइके गाउँपालिकाको लैनीबगरदेखि माथि डाँडामा पुगेको बेला जमुनाको मृत्यु भएको वडाध्यक्ष नरसिंह विष्टले बताएका छन् ।

यार्चागुम्बु संकलनका लागि डोल्पा पुगेकी रुकुम पश्चिमको आठबिसकोट नगरपालिका–४ गोतामकोट विष्ट गाउँकी जमुनाको मृत्यु भएको आफन्तले जनाएका छन् । जुमना लेक लागेर बिरामी भएपछि मृत्यु भएको वडाध्यक्ष विष्टले बताए ।

यार्चागुम्बु टिप्न डोल्पाको नाउरे भन्ने स्थानमा पुगेको बेला लेक लागेर बिरामी भएपछि साथमा रहेकी कान्छी बहिनी सरस्वती विष्टसहित घर फर्कँदै गर्दा बाटोमै जमुनाको मृत्यु भएको अध्यक्ष विष्टको भनाइ छ ।

मृतक जमुनाको शव जिल्ला अस्पताल डोल्पामा ल्याएर पोस्टमार्टम गरिनेछ । त्यसपछि जमुनाको शवलाई गोतामकोट ल्याउने तयारी आफन्तले गरेका छन् ।

Published : Tuesday, 2024 May 28, 11:14 am