इटहरी । प्रहरीले सुनसरी जिल्लामा कटुवा पेस्तोलसहित ४० वर्षीय किसन यादवलाई पक्राउ गरेको छ ।

हरिनगरा गाउँपालिका–१ हर्षाही बस्ने किसानलाई कटुवा पेस्तोल १ थान र सोही पेस्तोलको गोलीको खोका १ थानसहित शनिबार राति पक्राउ गरेको प्रहरीले विज्ञप्तिमार्फत जनाएको छ ।

भोक्राहा नर्सिङ गाउँपालिका–४ लबटोलिया बस्ने जुगेश्वर यादवको २ वटा भैसी चोरी गरी भएको भन्ने सूचना प्राप्त हुनासाथ प्रहरी चौकी चिरौलीबाट खटिएको प्रहरीले चोरीमा संलग्न किसनलाई पेस्तोलसहित फेला पारी पक्राउ गरेको थियो ।

प्रहरीले चोरीमा संलग्न हाल फरार अन्य व्यक्तिहरूको खोजी गर्नुका साथै चोरी र हतियार फेला भएको सम्बन्धमा आवश्यक अनुसन्धान गरिरहेको प्रहरीले जनाएको छ ।
उता, प्रहरीले रौतहटमा बाह्रबोरको बन्दुकसहित ४५ वर्षीय हरि स्याङतानलाई पक्राउ गरेको छ ।

चन्द्रपुर नगरपालिका–६ स्थित डाबरीबाट बाह्रबोरको एकनाले बन्दुक १ थानसहित सोही ठाउँ बस्ने स्याङतानलाई शुक्रबार राति प्रहरीले पक्राउ गरेको छ ।

ईलाका प्रहरी कार्यालय चपुरबाट खटिएको प्रहरीले ना.५१ प ७३२५ नम्बरको मोटरसाइकललाई जाँच गर्ने क्रममा मोटरसाइकलको लेग–गार्डमा प्लाष्टिकको बोरामा लुकाई राखेको उक्त बन्दुक फेला पारी चालक स्याङतानलाई पक्राउ गरेको हो ।

हाल फरार मोटरसाइकलमा सवार १ जनाको प्रहरीले खोजी गरिरहेको छ ।