काठमाडौं । नेपाली कांग्रेसले महासमितिको बैठकको मिति र तयारीका कारण कार्यतालिकामा परिमार्जन गर्नुपर्ने भएको जनाएको छ ।

शुक्रबार पार्टी केन्द्रीय कार्यालय सानेपामा बसेको केन्द्रीय कार्यसम्पादन समितिको बैठकले महासमितिको बैठक र तयारीका विषयमा परिमार्जन हुने विज्ञप्तिमा उल्लेख छ ।

भूकम्प र पार्टीका तहगत सम्मेलनहरूका कारण स्थगित भएका कार्यक्रमहरू समेत समाहित गरी पार्टी कार्यतालिका (क्यालेण्डर) परिमार्जन गरी केन्द्रीय कार्यालयले लागू गर्नेछ ।

नेपाली कांग्रेस केन्द्रीय कार्यसमितिको साउन २ देखि १० गतेसम्म बसेको बैठकले परिमार्जन सहित पारित गरेको पार्टीको वार्षिक कार्यतालिका कार्यान्वयन प्रारम्भ भइसकेको विदित रहेको जनाएको छ ।

कात्तिक १७ गते जाजरकोट र रुकुम पश्चिम लगायतका जिल्लामा गएको भूकम्पका कारण पार्टीले आफ्ना नियमित कार्यतालिकाका कार्यक्रम स्थगित गरी भूकम्प प्रभावित क्षेत्रमा केन्द्रित गरेको थियो ।

पार्टीका सबै तहका सम्मेलनहरू सम्पन्न गर्नेतर्फ ध्यान दिँदा कार्यतालिकाका कार्तिक र मंसिर महिनाका कार्यक्रमहरू प्रभावित हुन पुगेको कांग्रेसले जनाएको छ ।