काठमाडौं । नेपाली कांग्रेसका नेता तथा पूर्वमन्त्री शंकर भण्डारीसहितका केन्द्रीय नेताहरूले पार्टीको महासमिति बैठक लगायतका विषयमा परामर्श गरेका छन् ।

बुधबार बिहान पानीपोखरी, लाजिम्पाट, काठमाडौंमा बसेको नेता भण्डारीसहितका नेताहरूले महासमितिको बैठकमा उठाउने विषयवस्तुका बारेमा छलफल गरेका हुन् । उनीहरूले कांग्रेसको संगठन सुदृढीकरण, हिन्दु राष्ट्रको विषयलाई कसरी अगाडि बढाउने भन्नेबारेमा पनि छलफल गरेका छन् ।

नेता भण्डारीसहितका नेताहरूले पछिल्लो समय केही अराजक तत्वहरूले राजनीतिप्रति फैलाएको घृणालाई मत्थर पार्ने विषयमा पनि गम्भीर छलफल गरेका छन् । लोकतन्त्रमा आफ्ना धारणा र आलोचना गर्न पाइनेभन्दै नेताहरूले मर्यादित रुपमा प्रस्तुत हुनुपर्ने दायित्व सबैको रहेको जनाएका छन् ।

हिन्दु राष्ट्रको विषय महासमितिको बैठकमा कसरी प्रवेश गराउने भन्नेबारेमा रायसुझाव माग गरेको नेता भण्डारीले बताएका छन् ।

नेता भण्डारीका साथै बैठकमा केन्द्रीय सदस्यहरू देवेन्द्रराज कँडेल, पुष्पा भुसाल, गेहेन्द्र गिरी, चन्द्र केसी लगायतका नेताहरूको उपस्थिति रहेको थियो ।

नेता भण्डारीले सनातन हिन्दु राष्ट्रको पक्षमा आवाज उठाउँदै आएका छन् । हिन्दु राष्ट्र बनाउने विषयमा नेता भण्डारीले सभापति शेरबहादुर देउवासँग समेत भेट गरेर आग्रह गरिसकेका छन् ।

बैठकमा सहभागी पूर्वमन्त्री भण्डारीसहितका नेताहरू सभापति देउवा निकटका मानिन्छन् ।