काठमाडौं । स्वास्थ्य तथा जनसंख्यामन्त्री मोहनबहादुर बस्नेतले कोरोनाबाट मृत्यु भएकी सावित्री तिमिल्सिनाका छोराको पढाइको जिम्मा लिएका छन् ।

सिन्धुपाल्चोकको बाह्रबिसे नगरपालिकाको वडा नं. ९ राम्चेकी चालिसेको सुत्केरी भए लगत्तै कोरोना संक्रमणबाट मृत्यु भएको थियो । कोरोनाको संक्रमणबाट मृत्यु हुने चालिसे पहिलो नेपाली व्यक्ति हुन् ।

विसं २०७७ जेठमा चालिसेको मृत्यु हुँदा छोरा सफल नौ दिनका थिए ।

सफलको पढाइको जिम्मा लिएसँगै मन्त्री बस्नेतले उनलाई सोमबार टोखा नगरपालिका– ९ गोँगबुस्थित कान्तिपुर इङ्लिस एकेडेमीमा भर्ना गरिदिएका हुन् ।

उनले चालिसेको छोरा सफलको पठनपाठनको खर्चस्वरुप रू. ६० हजार नगद विद्यालयका प्राचार्य माधवप्रसाद अधिकारीलाई हस्तान्तरण गरेका छन् ।

मन्त्री बस्नेतले सफलको कक्षा १२ सम्मको पढाइ खर्च आफूले व्यहोर्ने बताए । मृतकका पति विमल चालिसेले मन्त्री बस्नेतको सहयोगप्रति आभार व्यक्त गरेका छन् ।