काठमाडौं । जाजरकोट जिल्लाको रामीडाँडा आसपास केन्द्रविन्दु बनाएर ११ बजेर ४७ मिनेटमा ६ दशमलब ४ म्याग्निच्युडको भूकम्प गएको छ ।

जमीनको सतहबाट करिब १० देखि १२ किलोमिटरमुनि भूकम्पको केन्द्र रहेको राष्ट्रिय भूकम्प मापन तथा अनुसन्धान केन्द्रले जनाएको छ ।

रामीडाँडा केन्द्रविन्दु भएर गएको भूकम्पपछि चार घण्टाको अवधिमा ४ म्याग्निच्युडभन्दा माथिका तीनवटा परकम्प गएका छन् ।

जाजरकोटमा गएराति गएको भूकम्प आफैंमा परकम्प रहेको जनाइएको छ । अरु साना कैयौं परकम्पहरू पनि गएका छन् । ४ रेक्टरभन्दा माथिका तीनवटा परकम्प मापन भएको छ ।

यसैबीच, जाजरकोट जिल्लामा भूकम्पबाट मृत्यु हुनेको संख्या ८६ पुगेको प्रहरीले जनाएकाे छ । एक सयभन्दा धेरै सर्वसाधारण घाइते भएका छन् ।

भूकम्पले जाजरकोटमा सबैभन्दा धेरै जनधनकोको क्षति पुर्‍याएको छ । दोस्रोमा पश्चिम रुकुम जिल्लामा भूकम्पले नोक्सानी गरेको छ । पश्चिम रुकुममा पनि मानिसहरूको मृत्यु भएको जनाइएको छ ।

उद्धारका लागि सुरक्षाकर्मी, जनप्रतिनिधि र स्थानीयहरू जुटेका छन् । घाइतेको उपचारका लागि पहलहरू भइरहेका छन् ।

प्रधानमन्त्री पुष्पकमल दाहाल ‘प्रचण्ड’ भूकम्प प्रभावित जिल्लामा बिहानै जान लागेका छन् । स्वास्थ्य तथा जनसंख्यामन्त्री मोहनबहादुर बस्नेत पनि प्रभावित जिल्लाहरूमा आफै गएर स्वास्थ्य उपचारको व्यवस्था गर्न लागेका छन् ।

नेपाली कांग्रेसका नेता तथा प्रदेश सभा सदस्य राजीवबिक्रम शाही पनि जाजरकोट जिल्लाका जनताको उद्धारमा आफै खटिएका छन् ।