काठमाडौं । मनकामना अस्पतालले गर्भवती महिलाको मृत्यु भएपछि २७ लाख ५० हजार क्षतिपूर्ति तिरेर उन्मुक्ति पाएको छ ।

चितवनको भरतपुरमा रहेको मनकामना अस्पतालमा उपचारका क्रममा भरतपुर महानगरपालिका वडा नं. २६ कि ३५ वर्षीया नवीना महतोको मृत्यु भएको थियो । अस्पतालले पीडित परिवारसँग गल्ती स्वीकार गरेको छ ।

अस्पताल प्रशासन र मृतकका आफन्तबीच शनिबार वार्ता भएको थियो ।

मणिकलाल महतोका अनुसार गत बिहीबार उपचारका लागि ल्याइएकी नवीनालाई शुक्रबार राति १ बजे अस्पतालले मृत घोषणा गरेको थियो ।

बच्चा जन्मिएपछि साल निकाल्दा अधिक रक्तश्राव भएको जानकारी गराएको पति मणिकलालले बताए ।

साल पाठेघर घरमा टाँसिएको भन्दै चिकित्सकले अधिक रक्तश्राव रोक्न नसकिएकाले पाठेघर नै फालेर बिरामी बचाउने प्रयास गरेको अस्पतालको दावी छ ।

अस्पतालको लापरबाहीले मृत्यु भएको भन्दै आफन्त र छिमेकीले अस्पतालमा आन्दोलन गरेपछि दुबै पक्ष बीच सहमति गरिएको छ ।

अस्पतालले शनिबारनै २७ लाख ५० हजार रुपियाँको चेक पीडित परिवारलाई हस्तान्तरण गरेको छ ।