काठमाडौं । स्वास्थ्य तथा जनसंख्यामन्त्री मोहनबहादुर बस्नेतसँग नेपाली कांग्रेस बागमती प्रदेश सभाका सदस्य (सांसद) मीनकृष्ण महर्जनले भेट गरेर प्यूटारको अस्पताललाई दश शय्याको बनाउन आग्रह गरेका छन् ।

मंगलबार मन्त्रालयमा मन्त्री बस्नेतसँग भएको भेटमा प्रदेश सभा सदस्य महर्जनले बागमती गाउँपालिका वडा नम्बर ४ प्युटारमा १० शय्याको हस्पिटलका लागि बजेट व्यवस्थापन गरिदिन आग्रह गरेका हुन् । मन्त्री बस्नेतले पनि प्युटारको अस्पालका लागि स्वास्थ्य मन्त्रालयमार्फत बजेट व्यवस्थापन गरिदिने आवश्वासन दिएको महर्जनले बताएका छन् ।

स्वास्थ्यमन्त्री बस्नेतले प्युटारको अस्पताललाई दश शय्या बनाउनका लागि डीपीआर (प्रस्ताव) पेश गर्न गाउँपालिकाका प्रमुख बीरबहादुर लोप्चलाई निर्देशन दिएका छन् ।

मन्त्री बस्नेतसँगको भेटका लागि बागमती प्रदेश सभाका सदस्य महर्जनसँग बागमती गाउँपालिकाका प्रमुख लोप्च पनि सँगै गएका थिए ।

प्रदेश सभा सदस्य महर्जनले आफ्नो क्षेत्रका लागि विभिन्न योजनाहरूमा बजेट समावेश गराएका छन् । उनले छुटेका योजनाहरूमा पनि बजेट ल्याउन जोडबल गरिरहेका छन् ।