काठमाडौं । बैंकिङ कसूरमा पक्राउ परेका लुम्बिनी प्रदेशका पूर्वमन्त्री एवं एमाले नेता विजय यादवले वनरक्षक बनाइदिने भन्दै रकम लिएको खुलासा भएको छ ।

एमालेका नेता यादवले एक युवकसँग चार लाख रुपियाँ घुस मागेको आरोप लागेको छ ।

प्रदेशको भूमि व्यवस्था, कृषि तथा सहकारीमन्त्री बनेका वेला यादवले दाङको दंगीशरण गाउँपालिका– ४ मिरौलीका ३७ वर्षीय हेतराम चौधरीसँग चार लाख रुपियाँ असुलेको आरोप छ ।

एमालेका नेता यादवले हेतराम चौधरीका २५ वर्षीय भाइ कृष्ण चौधरीलाई वनरक्षक बनाइदिने आश्वासन दिएपछि उनले रकम दिएको बताएका छन् ।

नेता यादवको खातामा साढे दुई लाख बढी रकम पठाएको भौचर हेतरामसँग सुरक्षित छ । बाँकी डेढ लाख भने बुटवलस्थित मन्त्रीनिवासमा बुझाएको उनको भनाइ छ ।

तत्कालीन मुख्यमन्त्री शंकर पोखरेलले यादवलाई मन्त्री नियुक्त गरेका थिए । तत्कालीन अवस्थामा यादव प्रदेश सांसद थिएनन् । निर्णयविपरीत कार्य गरेकाले जसपाले कारबाही गरेपछि यादवको सांसद पद गएको थियो ।

मुख्यमन्त्री पोखरेलले यादवलाई १९ वैशाख ०७८ मा मन्त्री नियुक्त गरेका थिए । त्यसको तीन महिनापछि प्रदेश लोकसेवा आयोगले एक सय ६ जना वनरक्षकको विज्ञापन खोलेको थियो । त्यही पदमा चौधरीलाई जागिर लगाइदिने नाममा तत्कालीन मन्त्री यादवले घुस लिएका थिए । यो विषयमा प्रतिक्रिया लिन खोज्दा पूर्वमन्त्री यादव सम्पर्कमा आएनन् ।

यादव ३१ असारमा बैकिङ कसुरमा बाँकेबाट पक्राउ परेका थिए । रुपन्देहीको सियारी गाउँपालिका– १ का उमाशंकर यादवको १२ लाख २८ हजार रुपियाँ फिर्ता नदिएको र दिएको चेकसमेत नसाटिएको भन्दै उनीविरुद्ध उजुरी परेको थियो । सोहीबराबरको रकम फिर्ता गरेपछि यादव मंगलबार नै रिहा भइसकेका छन् ।