प्रधानमन्त्री दाहालका पूर्वसल्लाहकारलाई उपचार गर्न सात लाख

काठमाडौं । प्रधानमन्त्री पुष्पकमल दाहाल ‘प्रचण्ड’का वैदेशिक मामिलाका पूर्व सल्लाहकार हीराबहादुर थापालाई उपचारका लागि सरकारले सात लाख रुपियाँ दिने निर्णय गरेको छ ।

नेपाल सरकारका पूर्व कामु परराष्ट्र सचिव थापालाई क्यान्सर उपचारका लागि सरकारले आर्थिक सहयोग उपलब्ध गराउने निर्णय गरेको हो । दाहाल पहिलो पटक प्रधानमन्त्री भएका बेला थापा सल्लाहकार थिए ।

भारत नयाँ दिल्लीस्थित राजिव गान्धी अस्पतालमा थापाको उपचार भइरहेको छ । थापालाई फोक्सोमा क्यान्सर देखिएको छ ।

थापालाई नागरिक राहत क्षतिपूर्ति तथा आर्थिक सहायता सम्बन्धी दोस्रो संशोधन कार्यविधि २०७३ मा रहेको व्यवस्था अनुसार आर्थिक सहायता उपलब्ध गराउने निर्णय भएको स्रोतले जनाएको छ ।

मन्त्रिपरिषदको चैत १६ गतेको निर्णय अनुसार थापालाई सात लाख रुपियाँ उपलब्ध गराउने निर्णय भएको थियो ।

Published : Monday, 2023 June 12, 9:54 pm