नेविसंघको केन्द्रीय कार्यालयमा गुण्डाहरूद्वारा हमला

काठमाडौं । अराजक समूहले नेपाल विद्यार्थी संघ (नेविसंघ)को केन्द्रीय कार्यालयमा आक्रमण गरेर क्षति पुर्‍याएको छ ।

बिहीबार साँझ नेविसंघका केही नेता कार्यकर्ताले अनामनगरस्थित केन्द्रीय कार्यालयभित्र प्रवेश गरेर तोडफोड गरेको हो । सो समूहले केही सामग्रीहरू पनि लुटेर लगेको छ । केन्द्रीय कार्यालयबाट डीएसएलआर क्यामरा, तीन वटा ल्यापटपसहितका सामान हराएको छ ।

नेविसंघका नेता विनोदराज जोशीले केही विद्यार्थी नेताहरू आएर केन्द्रीय कार्यालयमा तोडफोड गरेको बताए ।

स्वतन्त्र विद्यार्थी युनियनको निर्वाचन आउन केही दिन मात्रै बाँकी रहेका बेला नेविसंघको मुख्यालयमा आक्रमण भएको छ ।

आक्रमणबाट कार्यालयका झ्यालका सिसा फुटेका छन् । कुर्सी, टेबुलमा पनि क्षति पुगेको छ ।

केन्द्रीय कार्यालयमा आक्रमण गरेर क्षति पुर्‍याउने समूह अराजक र गुण्डाहरू भएको प्रत्यक्षदर्शीले बताएका छन् ।

Published : Thursday, 2023 March 2, 8:48 pm