घोराही । एमालेबाट निर्वाचित भएका दाङको घोराही उपमहानगरपालिकाका प्रमुख नरुलाल चौधरीले प्रयोग गर्ने गाडीलाई प्रहरीले नियन्त्रणमा लिएको छ ।

मौन अवधिमा स्रोत साधनको दुरूपयोग गरी निर्वाचन प्रभावित पार्न खोजिएको आरोपसहित शनिबार घोराही–१७ का स्थानीयले मेयर चढ्ने रा १ झ १४५ नम्बरको गाडीको हावा खुस्काइ दिएका हुन् । मेयर चौधरीले एमालेका प्रतिनिधि सभाका उम्मेदवार शंकर पोखरेलका लागि सरकारी साधन स्रोत दुरुपयोग गरेको आरोप छ ।

गाडीको हावा फालिदिएपछि गाडी स्थानीयले नियन्त्रणमा लिएका थिए । स्थानीयले मेयर चौधरीको गाडीको हावा फालिदिएर सबक सिकाएका छन् ।

मेयर चौधरीको सरकारी गाडीलाई प्रहरीले नियन्त्रणमा लिएको दाङ प्रहरीका प्रमुख (एसपी) वीरबहादुर वलीले बताएका छन् ।
एमालेको पक्षमा चुनाव प्रभावित बनाउन चौधरीले सरकारी गाडी प्रयोग गरेका थिए ।

दाङ क्षेत्र नम्बर २ बाट प्रतिनिधिसभा निर्वाचनमा एमालेका महासचिव शंकर पोखरेल र माओवादी केन्द्रकी नेतृ रेखा शर्मा प्रतिस्पर्धामा छन् ।

एमालेका नेता समेत रहेका मेयर चौधरीले निर्वाचन आचारसंहिताको उल्लंघन गर्दै आएका थिए ।

चौधरीले आफ्नो पदीय जिम्मेवारी विपरित एमाले महासचिव पोखरेलको चुनावी प्रचारमा हिँडेको आरोप लाग्दै आएको थियो ।