काठमाडौं । बिचौलियालाई भित्र्याएर उत्पात काण्ड गरेपछि विवादमा परेका अर्थमन्त्री जनार्दन शर्माले मन्त्री पदबाट राजीनामा दिने घोषणा गरेका छन् ।

बुधबार बसेको प्रतिनिधिसभा बैठकमा सम्बोधन गर्दै शर्माले मन्त्री पदबाट राजीनामा दिने घोषणा गरेका हुन् ।

उनले संसदीय छानबिनलाई सहयोग गर्न राजीनामा दिएको घोषणा गरेका छन् ।

मन्त्री शर्माले विचौलियालाई अर्थमन्त्रालयमा छिराएर करको दर रेट हेरफेर गरेको आरोप लागेको थियो ।

चौधरी ग्रुप र केही सीमित व्यापारीलाई फाइदा हुने गरेर शर्माले बजेट बनाएको आरोप छ ।

यसअघि, प्रमुख प्रतिपक्ष दल एमालेको माग बमोजिम अर्थमन्त्री शर्मामाथि छानविन गर्न ११ सदस्यीय छानविन समिति गठन भएको थियो ।

संसदीय छानविन विशेष समितिमा विभिन्न दलका तर्फबाट रहेका सांसदहरूमा खगराज अधिकारी, देव गुरुङ, पुष्पा भुसाल, प्रदीप ज्ञवाली, भानुभक्त ढकाल, विमला बिक, लक्ष्ममणलाल कर्ण, शक्तिबहादुर बस्नेत, सरलाकुमारी यादव, सीताराम महतो र सुरेन्द्रप्रसाद यादव रहेका छन् ।

समितिलाई १० दिनको समय दिइएको छ । छानबिन समिति बनेपछि अर्थमन्त्रीले राजीनामा दिएका हुन् ।

विगतमा एमालेबाट मन्त्री बनेकाहरूले भने विवादमा पर्दा राजीनामा दिएका थिएनन् । अर्थमन्त्री हुँदा विवादमा परेपछि भरतमोहन र विष्णु पौडेलमाथि संसदीय समितिले छानबिन गरेको थियो ।

झलनाथ खनाल प्रधानमन्त्री भएका बेला २०६८ सालमा अर्थमन्त्री अधिकारी थिए । त्यतिबेला बजेट लिक भएको विषय संसदमा विरोध भएपछि संसदीय छानबिन समिति बनेको थियो । छानबिन समिति बनेपछि उनले राजीनामा दिएनन् ।

२०७३ मा एमाले अध्यक्ष खड्गप्रसाद ओली प्रधानमन्त्री हुँदा पौडेल अर्थमन्त्री थिए । पौडेल अर्थमन्त्री भएका बेला पनि बजेट पनि बजेट लिक हुँदा संसदीय छानबिन समिति बनेको थियो ।