काठमाडौं । नेपाली कांग्रेसका नेता एवम् डडेल्धुराका पूर्वसभापति कर्णबहादुर मल्लले कांग्रेसका उम्मेदवारहरूलाई हराउन अन्तरघाती हर्कतहरू गरिरहेका छन् ।

स्थानीय तहको निर्वाचनमा पार्टीका आधिकारिक उम्मेदवारहरूलाई जिताउनुपर्ने बेला मल्लले डडेल्धुरामा कांग्रेस हराउने अभियानको नेतृत्व गरेको आरोप छ । आफूले भनेअनुसार नभएपछि आत्तिएका मल्लले स्थानीय तहमा कांग्रेस हराउन मोर्चा कसेका हुन् ।

मल्लको समूहले वैशाख ३० गते हुन गइरहेको स्थानीय तह निर्वाचनमा बागी उम्मेदवारी दिने तयारी गरेको चर्चा छ ।

मल्लले डडेल्धुराका दुई नगरपालिका र ५ गाउँपालिकामा प्यानलसहित बागी उम्मेदवारी दिन लागेको आरोप छ ।

मल्लले अमरगढी नगरपालिकामा हरि भट्ट र परशुराम नगरपालिकामा डम्बरसिंह विष्टको नेतृत्वमा बागी उम्मेदवारी दिने तयारी गरेका छन् ।

गन्यापधुरा गाउँपालिकामा सुरेन्द्र मालीको नेतृत्वमा बागी उम्मेदवारी दिने तयारी छ ।

नवदुर्गा गाउँपालिकामा गोकुल शाही र भागेश्वर गाउँपालिकामा लोकराज भट्टको नेतृत्वमा मल्लले बागी उम्मेदवार उठाउने तयारी गरेका छन् ।

अजयमेरु गाउँपालिकामा नरबहादुर ठकुराठी, लोकराज भट्ट र कमला विष्टमध्ये कुनै एकको नेतृत्वमा बागी उम्मेदवार बन्ने चर्चा छ ।

आलिताल गाउँपालिकामा धनबहादुर देउवा र तेजबहादुर खड्कामध्ये कुनै एकको नेतृत्वमा मल्लले बागी उम्मेदवार उठाउन लागेका छन् ।

पूर्वसभापति मल्लले पार्टी अनुशासन र विधान विपरितका हर्कत गर्दै आएका छन् । मल्ललाई अनुशासनको कारबाही गर्न माग पनि उठेको छ ।

सभापति शेरबहादुर देउवाको गृहजिल्ला डडेल्धुरामा मल्लको हर्कतले कांग्रेसका कार्यकर्ता निराश छन् ।