काठमाडौं । प्रधानन्यायाधीश चालेन्द्रशम्शेर जबराविरुद्ध महाअभियोगको प्रस्ताव दर्ता गरेकै दिन नेपाली कांग्रेसका नेता शेखर कोइरालाले राष्ट्रपति विद्यादेवी भण्डारीसँग सुटुक्क भेटवार्ता गरेका छन् ।

आइतबार शीतलनिवास पुगेर कोइरालाले भण्डारीसँग भेट गरेका हुन् । भेटमा के–के विषयमा कुराकानी भएको हो कोइराला र भण्डारीले केही भनेका छैनन् ।

प्रधानन्यायाधीश जबरालाई महाअभियोग लगाएको विषयमा शेखरले आफ्नो धारणा सार्वजनिक गरेका छैनन् ।

प्रधानमन्त्री समेत रहेका सभापति शेरबहादुर देउवाको सधैँ आलोचना र असहयोग गरेर नेता बनेका शेखरले महाअभियोगको प्रस्ताव दर्ता भएकै दिन भण्डारीलाई भेटेपछि रहस्यको विषय बनेको छ ।

भण्डारीको मातृपार्टी एमाले महाअभियोगको विपक्षमा छ । एमालेले महाअभियोगको सामना गर्ने निर्णय गरिसकेको छ ।

एमालेकी पूर्वउपाध्यक्ष समेत रहेकी राष्ट्रपति भण्डारीले पदीय मर्यादा विपरीत राजनीतिक भेटघाट गरेको भनेर आलोचना हुँदै आएको छ ।

यसअघि, एमालेका अध्यक्ष खड्गप्रसाद ओली र माओवादी केन्द्रका अध्यक्ष पुष्पकमल दाहाल ‘प्रचण्ड’लाई भेट गरिसकेका शेखरले भण्डारीलाई अचानक भेट गरेपछि कांग्रेसका कार्यकर्ताहरू चकित परेका छन् ।

शेखरले नेपाली कांग्रेस नेतृत्वको ५ दलीय गठबन्धनको बिरोध गर्दै आएका छन् । उनले निर्वाचनमा गठबन्धन गरेर जान नहुने बताउने गरेका छन् ।

कांग्रेसलाई स्थानीय तहको निर्वाचनमा माओवादी केन्द्र, नेकपा (एकीकृत समाजवादी)सहितका दलहरूसँग गठबन्धन हुन नदिने शेखरले सार्वजनिक रुपमा बताउँदै आएका छन् ।

पार्टीको लाइनभन्दा बाहिर गएर कम्युनिस्टहरूलाई भेटेर ५ दलीय गठबन्धनको विरोध गर्दै आएका शेखरका हर्कत र गतिविधिहरू शंकास्पद रहेको भनेर आलोचना गरेको छ ।