काठमाडौं । अधिकांश बैंकहरूले निक्षेप तथा कर्जाको ब्याजदर बढाएका छन् ।

बैंक तथा वित्तीय संस्थाहरूमा केही समयअघिसम्म पर्याप्त लगानी योग्य रकम (तरलता) रहेको थियो ।

कोरोना संक्रमणको जोखिम कम हुँदै गएसँगै बैंकहरुमा तरलता घट्दै गएको छ । राष्ट्र बैंकका अनुसार अहिले बजारमा करिब १९ अर्ब रुपियाँमात्रै तरलता रहेको छ ।

निक्षेपमा सबैभन्दा बढी ब्याजदर सनराइज बैंकले दिने भएको छ । बैंकले सार्वजनिक गरेको तथ्यांक अनुसार निक्षेपमा १० दशमलव ०७ प्रतिशत दिनेछ ।

धेरै ब्याजदर दिनेमा प्राइम कमर्सियल बैंक दोस्रो र मेगा बैंक तेस्रो नम्बरमा देखिएको छ । प्राइमले ९ दशमलव ७५ प्रतिशत ब्याजदर दिने उल्लेख गरेको छ भने मेगाले ९ दशमलव ५५ प्रतिशत दिने बताएको छ । नबिल बैंकले मुद्दति निक्षेपमा ९.२६ प्रतिशतसम्म ब्याजदर दिने बताएको छ ।

राष्ट्रिय वाणिज्य बैंकले साधारण बचतमा ३.०६ प्रतिशतदेखि ६ प्रतिशतसम्म ब्याज दिने भएको छ । मुद्दति निक्षेपमा ८.०६ प्रतिशतसम्म ब्याज दिनेछ ।