काठमाडौं । प्रधानमन्त्री खड्गप्रसाद ओलीले महन्थ ठाकुर–राजेन्द्र महतो नेतृत्वको जनता समाजवादी पार्टी, नेपाल (जसपा)का मन्त्रीहरू समेटेर सोमबार मन्त्रिपरिषद विस्तारको तयारी गरेका छन् ।

स्रोतका अनुसार ओलीले ठाकुर–महतोसँग मन्त्रीहरूको सूची मागेका छन् । जसपाभित्र मन्त्री बन्न धेरैले इच्छा जनाएका छन् । ओलीले ठाकुर–महतोलाई उप–प्रधानसहित १० मन्त्रालय दिन तयार भएको चर्चा छ ।

तर, ओली निकटका एक नेताले ठाकुर–महतोलाई ८ वटा मन्त्रालय दिने सहमति भएको दाबी गरेका छन् ।

माओवादी छाडेर एमालेमा प्रवेश गरेका रामबहादुर थापा, लेखराज भट्ट, टोपबहादुर रायमाझी, प्रभु साह, मणि थापा, दावा तामाङको मन्त्री पद सर्वोच्च अदालतले खाइदिएपछि ती मन्त्रालयहरू रिक्त छन् । पूर्वमाओवादी नेताहरूले सम्हालेका मन्त्रालय जसपाले पाउने चर्चा छ ।

ठाकुर–महतोको मागअनुसार ओलीले विवादास्पद नागरिकतासम्बन्धी अध्यादेश जारी गरेपछि जसपा सरकारमा सहभागी हुन लागेको जनाइएको छ ।

टीकापुर हत्याकाण्डमा सजाए पाएर डिल्लीबजार कारागारमा रहेका रेशमलाल चौधरीको मुद्धालाई पनि सर्वोच्च अदालतमा पेशी छिटो गरेर किनारा लगाउने बुझिएको छ । अदालतमा विचाराधीन विषय भएकाले रेशमलाल चौधरीका विषयमा अझै के हुने हो जसपाले मुख खोल्न चाहेको छैन ।

ओलीले राजेन्द्र महतोलाई उप–प्रधानसहित गृहमन्त्री बनाउने चर्चा जसपाभित्र छ ।

जसपाका नेताहरू राजकिशोर यादव, अनिल झा, शरदसिंह भण्डारी, चन्दा चौधरी पनि मन्त्री बन्ने चर्चा छ ।

मन्त्री बन्न लागेकी चन्दा चौधरी भारतीय चेली हुन् । चौधरी विवाह गरेर नेपालमा आएकी हुन् । केही वर्ष अगाडि चौधरी राज्य मन्त्री बनेकी थिइन् । आफू चढ्ने गाडी बिग्रिएको भनेर गाडीमा मुड्कीले हानेर विवादमा परेकी थिइन् ।