जवलाखेल । नेपाली कांग्रेस ललितपुरले संसद विघटनको विरोधमा प्रधानमन्त्री खड्गप्रसाद ओलीको कदमविरुद्ध भव्य प्रदर्शन गरेको छ ।

ललितपुरको लगनखेलबाट शुरु भएको विरोध प्रदर्शन जावलाखेलमा पुगेर विरोध सभामा परिणत भएको कांग्रेसका युवा नेता एवम् केन्द्रीय खेलकुद विभागका सचिव मीनकृष्ण महर्जनले जानकारी दिए । विरोध प्रदर्शनमा सहभागीहरूले प्रधानमन्त्री ओलीविरुद्ध नारावाजी गर्नुका साथै संविधानको रक्षाका लागि माग गरेको महर्जनले बताए ।

विरोध सभालाई ललितपुर कांग्रेसका सभापति मदनबहादुर अमात्य, पूर्वराज्यमन्त्री उदयशम्शेर राणा, नेपाल तरुण दलका अध्यक्ष जितजंग बस्नेतसहितका नेताहरूले सम्बोधन गरेको युवा नेता महर्जनले जानकारी दिए ।

विरोध सभालाई सम्बोधन गर्ने कांग्रेस नेताहरूले ओलीले संविधानको अधिकारभन्दा बाहिर गएर संसद विघटन गरेको भन्दै आक्रोश पोखेका छन् । उनीहरूले प्रधानमन्त्री र राष्ट्रपतिले संविधानलाई पालना गर्नुभन्दा पनि उल्लंघन गरेको भन्दै कांग्रेसले संविधान विपरितको गतिविधिको विरोध गर्ने बताए ।

विभागका सचिव महर्जनका अनुसार प्रधानमन्त्री ओलीको कदमविरुद्ध ललितपुरका हजारौँ सर्वसाधार सडकमा उत्रिए विरोध जनाएको बताए ।