वीरगञ्ज । नेपाली कांग्रेसका सह–महामन्त्री डा. प्रकाशशरण महतले प्रतिनिधि सभाको विशेष अधिवेशन बोलाउन माग गरेका छन् ।

नेपाल प्रेस युनियन पर्सा शाखाले बुधबार वीरगञ्जमा आयोजना गरेको पत्रकार सम्मेलनमा डा.महतले जनताको समस्या राख्ने र सरकारलाई जवाहदेही बनाउने मुख्य थलो संसदलाई बन्द गरिराख्न उचित नहुने बताए ।

उनले कम्युनिस्ट सरकारसँग तत्काल विशेष अधिवेशन बोलाउन माग गरे ।

उनले देशभित्र उठेका प्रश्नको जवाफ सरकारले संसदको विशेष अधिवेशनमा दिनुपर्ने बताए ।

उनले भने, ‘कोरोना संक्रमण रोकथाम र उपचारमा सरकारले खेलेको भूमिकाबारे प्रश्न उठिरहेको छ ।’

‘कोरोना संक्रमितको उपचारका लागि पैसा छैन भन्ने तर पार्टीका नेताको व्यवस्थापनका लागि सामान खरिदमा करोडौं संस्थागत भ्रष्टाचार गर्ने ?’, डा.महतले भने, ‘यसले जनता मारमा परेका छन् ।’

‘मुलुकमा भएका भ्रष्टाचार र बेथितिको विरोध गरेकै कारण संसद नै बन्द गरेर लोकतन्त्रलाई बन्धक बनाएर राखिएको छ’, कांग्रेसका सह–महामन्त्री डा.महतले भनेका छन् ।

नेपाली कांग्रेसका युवा नेता डा.महत बारा जिल्लामा आयोजित कार्यक्रममा सहभागी हुन मंगलबार गएका थिए । उनले स्थानीय नेता कार्यकर्ताहरूसँग भेटवार्ता समेत गरेका छन् ।