गुलरिया । बर्दिया जिल्लामा भीमबहादुर डाँगीको शवको अन्तिम दाहासंस्कार गर्ने क्रममा कोरोना संक्रमणबाट मृत्यु भएको जानकारी पाएपछि मलामीहरू घाटबाट भागेका छन् ।

मधुवन नगरपालिका–९ का ७० वर्षीय डाँगीको शवको अन्तिम संस्कार गर्न आफन्तसहित मंगलबार दिउँसो कसुम्बा घाटमा मलामी पुगेका थिए ।

शव खरानी हुँदै गर्दा अन्त्यतिर घाट आइपुगेको प्रहरीले मृतक डाँगीलाई कोरोना पोजिटिभ भएको जानकारी दिएको बताए । त्यसपछि मलामीहरू एक–एक गरेर भागेको जनाइएको छ ।

कोरोनाको जानकारी आएपछि छिन भरमै त्रास छाएको एकजना मलामीले बताए ।

कोहलपुर शिक्षण अस्पतालमा सोमबार राति डाँगीलाई मृत घोषणा गरिएको थियो । शवको स्वाब रिपोर्ट ढिला भएका कारणले आफन्तले अन्तिम संस्कार गर्न घाटमा लगेका थिए ।

शबको अन्तिम संस्कार हुँदाहुँदै प्रहरी कोरोना पोजेटिभ भएको खबर लिएर घाटमा पुगेका थिए । प्रहरीले आफन्त र शव छोएकाको पहिचान गरिसकेको छ ।

अन्य मलामीलाई होम क्वारेन्टिनमा बस्न आग्रह गरेको मधुवन नगरप्रमुख कृष्ण केसीले बताएका छन् ।

केसीले कन्ट्रयाक्ट ट्रेसिङको आधारमा सबै स्वाब परीक्षणको प्रक्रिया अघि बढाउन स्वास्थ्य प्रमुखलाई निर्देशन दिइसकेको बताएका छन् ।