कालिकोट । सत्तारुढ नेपाल कम्युनिस्ट पार्टी (नेकपा)ले कालिकोट जिल्लाको पलाँता गाउँपालिका अध्यक्ष लक्ष्मण बमलाई जिल्ला कमिटी सदस्यबाट निलम्बन गरेको छ ।

नेकपाले अध्यक्ष बमलाई आर्थिक अनियमिता, पार्टीको निर्देशन अस्वीकार गरेको लगायतका आरोप लगाउँदै निलम्बित गरेको हो ।

नेकपा कालिकोटका अध्यक्ष धनजित शाहीले अनुशासनहीन काम गरेपछि बमलाई निलम्बन गरेको बताए ।

नेकपा कालिकोटले बमको आर्थिक अनियमितता र अनुशासनहीन कार्यको छानविन गर्न छानविन समिति समेत बनाएको छ ।

छानविन समिति नेकपा कर्णाली प्रदेशका सदस्य विष्णु विकको संयोजकत्वमा ३ सदस्यीय रहेको छ ।

समितिको सदस्यमा नेकपाका जिल्ला सदस्यद्वय कृष्णप्रसाद आचार्य र टेकबहादुर बुढा रहेका छन् ।

अध्यक्ष बममाथि कारबाहीको माग गर्दै जिल्ला समितिका १० जनाले पार्टीमा उजुरी गरेका थिए ।

अध्यक्ष बमले आफू पार्टीबाट निलम्बनमा परेपनि जनताबाट निलम्बनमा नपरेको बताएका छन् ।

बम मुख्यमन्त्री महेन्द्रबहादुर शाही निकटका मानिन्छन् ।