काठमाडौं । कैलास सिरोहिया मालिक रहेको कान्तिपुर दैनिकको प्रधान सम्पादकबाट नारायण वाग्लेले राजीनामा दिएका छन् ।

वाग्लेले राजीनामा दिएपछि सोमबारदेखि लागू हुने गरी सुधिर शर्मालाई नयाँ सम्पादकमा नियुक्त गरिएको छ ।

आन्तरिक द्वन्द्व पत्रकार र कर्मचारीबीच गुटको राजनीतिले गर्दा कान्तिपुर दैनिकको स्तर दिन प्रतिदिन खस्कदै गएको थियो ।

देशै एक नम्बर दैनिक पत्रिका दाबी गर्ने कान्तिपुर दैनिकका मालिक सिरोहियाले पुनः वाग्लेलाई हटाएर शर्मालाई भित्र्याएसँगै समाचारको गुणस्तर बढ्नेमा धेरैले अपेक्षा लिएका छन् ।

गत वर्ष शर्मालाई हटाएर सिरोहियाले वाग्लेलाई कान्तिपुर दैनिकको प्रधान सम्पादकको जिम्मेवारी दिएका थिए ।

कान्तिपुर दैनिकमा १४ वर्षअघि वाग्लेलाई नै विस्थापित गरेर शर्माले प्रधान सम्पादकको जिम्मेवारी पाएका थिए ।

गत वर्ष कान्तिपुर मिडिया ग्रुपमा बिजनेस डाइरेक्टरका रुपमा भारत नागरिक रजनीश ऋखिलाई नियुक्त गरिएको थियो । ऋखिले टाइम्स अफ इन्डियामा प्रमुख भूमिकामा जिम्मेवारी निर्वाह गरिसकेका व्यक्ति हुन् । ऋखिले पनि कान्तिपुर दैनिकलाई छाडेका छन् ।

ऋखि आएपछि कान्तिपुर दैनिकबाट शर्मा र काठमाण्डु पोस्टबाट अखिलेश उपाध्यायले प्रधान सम्पादकबाट राजीनामा दिएका थिए ।

कर्पोरेट र बिजनेश नेतृत्वमा भारतीय नागरिक ऋखि आएपछि शर्मा र उपाध्यायले कान्तिपुर दैनिकले राष्ट्रिय हितमा सम्झौता गरेको भन्दै राजीनामा दिएका थिए ।

उपाध्यायले काठमाण्डु पोस्ट छाडेपछि उनको ठाउँमा प्रधान सम्पादक बनेर अनुप काफ्ले आएका थिए ।

कान्तिपुर दैनिकमा कार्यरत पत्रकार र कर्मचारीहरूमा पलाएको घमण्डले गर्दा पनि यो दैनिक पत्रिकालाई क्रमशः विज्ञापनहरू घट्दै गएको चर्चा थियो ।