काठमाडौं । तराईका बाढी पीडितहरूका लागि नेपाल विद्यार्थी संघका राहत संकलन गर्ने निर्णय गरेको छ ।

राहत संकलन गरेर कसरी वितण गर्ने भन्ने विषयमा छलफल गर्न नेविसंघका नेताहरूले साउन ७ गते काठमाडौंमा वृहत भेलाको आयोजना गरेका छन् । भेला कमलादीस्थित प्रज्ञा भवनमा दिउँसो १ बजे हुनेछ ।

भेलामा सहभागी हुन र सुझाव तथा राहत उपलब्ध गराउन नेविसंघका पूर्वउपाध्यक्ष ऋषिकेशजंग शाहले जानकारी दिएका छन् । उनले भने, ‘तराईका बाढी पीडितलाई नेविसंघको तर्फबाट सक्दो सहयोग गर्ने छौँ । राहत संकलन गरेर वितरण गरिनेछ । सबैको सल्लाह र सुझावअनुसार अगाडि बढ्ने छौँ ।’

शाहले राहत संकलन र वितरणको कार्य चुनौतीपूर्ण रहेको भन्दै यो अभियानमा सहभागी हुन नेपाली कांग्रेसका सबै शुभेच्छुकहरूलाई अपील गरेका छन् ।

तराईका बाढी पीडितलाई राहत संकलन गरेर वितण गर्ने बारेमा निर्णय गरेको जानकारी नेविसंघका नेताहरूले आइतबार बिहान बुढानिलकण्ठस्थित निवासमा सभापति शेरबहादुर देउवालाई भेटेर जानकारी गराएको नेविसंघका दुजाङ शेर्पाले बताए ।

नेपाली कांग्रेसका सभापति देउवाले पनि नेविसंघका नेताहरूले बाढी पीडितका लागि राहत संकलन गर्न लागेकोमा विद्यार्थी नेताहरूलाई धन्यावाद दिएका छन् ।

नेविसंघका पूर्वउपाध्यक्ष शाहको नेतृत्वमा बुढानिलकण्ठ पुगेका नेविसंघका विद्यार्थी नेताहरूले राहत संकलनका लागि सभापति देउवासँग अनुमति लिएको छ ।

नेविसंघका नेता शाहले भने, ‘यो राहत संकलन अभियान नेपाल सांस्कृतिक संघसँग मिलेर गरिनेछ । संघका अध्यक्ष तीर्थ थापामार्फत् नेपाल सांस्कृतिक संघलाई विशेष अपील र धन्यावाद छ ।’

तराईका बाढी पीडितहरूले सरकारसँग अपेक्षा गरेअनुसार राहत नपाइरहेको भनेर गुनासो भइरहेका बेला नेविसंघले राहत संकलनको अभियान चलाउन लागेको छ ।