विराटनगर । कम्युनिस्ट सरकारका श्रम तथा सामाजिक सुरक्षामन्त्री गोकर्ण विष्टले श्रम कार्यालय मोरङका वरिष्ठ श्रम अधिकृत प्रेम सन्जेललाई साढे दुई महिनाभित्रै सुरुवा गरेपछि बबण्डर मच्चिएको छ ।

भ्रष्टाचार विरोधी अभियानमा रहेका उपसचिवस्तरका सन्जेलले विराटनगरमा सोमबार पत्रकार सम्मेलन गरेर कम्युनिस्ट सरकारको धज्जी उडाएका छन ।

श्रममन्त्री विष्टले विभिन्न व्यक्ति र समूहको कुरा सुनेर आफूलाई सरुवा गरिदिएको सन्जेलले आरोप लगाएका छन । सन्जेलले आफूलाई भ्रष्टाचार गर्न पटक पटक दवाव दिँदा पनि कसैको दवावमा नपरेको बताए ।

श्रम कार्यालय मोरङका वरिष्ठ श्रम अधिकृत सन्जेलले आफ्नो सरुवा अढाई महिनामा अन्यत्र गरिएपछि सार्वजानिक रुपमै रोष प्रकट गरेका हुन् ।

सञ्जेलले सुनसरी सरुवा गरिएपछि प्रधानमन्त्री केपी ओली, श्रममन्त्री गोकर्ण बिष्ट र मन्त्रालयका सचिव महेश दाहालमाथि आक्रोश पोखेका छन् ।

वरिष्ठ श्रम अधिकृत सञ्जेलले क्षेत्रीय निर्वाचन कार्यालय मोरङबाट श्रम कार्यालयमा सरुवा भएको तीन महिना नपुग्दै गरिएको सरुवाको जवाफ माग गरेका छन् ।

‘मेरो घरमा चढ्ने साइकल छैन, तर मेरै कनिष्ठ कर्मचारीसँग कार छ’, उनले भनेका छन, ‘मभन्दा कनिष्ठ कर्मचारीहरूलाई प्रधानमन्त्री ओलीले किनिदिएको हो । अनि मलाई सरुवा गरिदिएको हो ।’

सञ्जेलले चार दशकको काम गराइको सन्दर्भमा आफूविरुद्ध कसैले भ्रष्टाचार भएको उजुरी दिन चुनौती दिएका छन । ‘हाम्रो मुलुकमा नेतादेखि अधिकांश क्षेत्रमा मानिसहरू भ्रष्टाचारमा लिप्त रहेका छन’, उनले भने ।

सञ्जेललाई पुस ५ गते कामकाजका लागि व्यावसायिक तथा सीप विकास तालिम प्रतिष्ठान इटहरीमा सरुवा गरिएको छ ।

मलेसियामा रोजगारी रोकिएपछि विवादमा तानिएका मन्त्री विष्ट फेरि आफनै मन्त्रालयका कार्मचारी सरुवामा विवादमा परेका छन ।