कांग्रेसकाे महाधिवेशन काेराेनाले राेक्न नसक्ने, कार्यतालिकामा हेरफेर
काठमाडौं । नेपाली कांग्रेसले तोकिएकै समयमा १४औँ महाधिवेशन गर्ने गरी कार्यतालिकामा परिमार्जन गरेको छ ।
सानेपामा मंगलबार बसेको केन्द्रीय कार्यसमितिको बैठकले कोरोना महामारीका कारण प्रभावित भएको महाधिवेशन कार्यतालिका परिमार्जन गरेको हो ।
प्रवक्ता विश्वप्रकाश शर्मा असार १५ गतेभित्र सक्ने भनिएको अन्तरिम संरचनाको समायोजन असार मसान्तमा सक्ने निर्णय भएको जानकारी दिए ।
शर्माले साउन मसान्तमा सभापतिबाट प्रमाणित क्रियाशील सदस्यहरूको अन्तिम नामावली केन्द्रीय निर्वाचन समितिमा बुझाउने र पुस ७ गते देशभरिका ७ हजार वडाको अधिवेशन गर्ने निर्णय भएको बताए ।
कांग्रेसले ७ सय ५१ वटा स्थानीय तहमा पुस ८ गते प्रदेशसभाको पुस ११ गते र प्रतिनिधिसभाको एक निर्वाचन क्षेत्र भएका जिल्लाको अधिवेशन पुस १३ गते गरिसक्ने निर्णय गरेको छ ।
एकभन्दा बढी प्रतिनिधिसभा निर्वाचन क्षेत्र भएका जिल्लामा पुस १६ गते, प्रदेशहरूमा माघ ६ गते अधिवेशन गर्ने निर्णय कांग्रेस केन्द्रीय समितिले गरेको छ ।
पार्टीको महाधिवेशन भने पूर्वनिर्धारित मिति फागुन ७ बाट १० गतेसम्म हुने प्रवक्ता शर्माले बताएका छन् ।
फेसबुकबाट तपाईको प्रतिक्रिया