मन्त्री क्वाटरमा गरिबी निवारणमन्त्रीको ‘हाइप्रोफाइल’ तीजको दर (भिडियो)
काठमाडौं । दुईतिहाइको कम्युनिस्ट सरकारकी भूमि व्यवस्था, सहकारी तथा गरिबी निवारणमन्त्री पद्मा अर्यालले तीज पर्व आउनुभन्दा एक हप्ता अगाडि नै हाइप्रोफाइल भोजभतेर गरेर रमाइलो गरेकी छिन् ।
मन्त्री अर्यालले ललितपुरको पुल्चोकस्थित आफ्नै सरकारी क्वाटरमा बुधबार तीज पर्वका असरमा होइप्रोफाइल महिला नेतृहरूलाई बोलाएर दर खुवाकी हुन् ।
मन्त्री अर्यालले आफूलाई सरकारले बस्न दिएको क्वाटरभित्र ठूला र नाम चलेका महिला नेतृलाई मात्रै बालाएर दर खुवाएपछि आफ्नै पार्टीका नेतृहरूले आलोचना गरेका छन् ।
सत्तारुढ नेपाल कम्युनिस्ट पार्टी (नेकपा) निकटका पूर्वमन्त्री, सांसद, महिला नेतृ, अधिकारकर्मी, सञ्चारकर्मीलगायत सीमित हाइप्रोफाइल महिलाहरूलाई मात्रै दर खान बोलाइएको स्रोतले जनाएको छ ।
तीजको दर खाना बोलाइएका पार्टी निकटका हाइप्रोफाइल महिला नेतृहरूलाई मीष्ठान्न भोजन खुवाइएको थियो । खानेकुरामा थरीथरीका परिकारहरू राखिएको थियो ।
दर खाने कार्यक्रममा मन्त्री अर्यालले एकजना बराबर करीव ६ सय रुपियाँ खर्च गरेको जनाइएको छ ।
पेटभरि दर खाएपछि मन्त्री अर्यालसहित नेकपाका नेतृहरू छमछमी नाचेका थिए । उनीहरू नाचेको भिडियो सामाजिक सञ्जालमा भाइरल बनेको छ ।
उता, केही दिन अगाडि ऊर्जा, जलस्रोत तथा सिँचाइमन्त्री वर्षमान पुनले पनि सिंहदरबारभित्र भव्य रुपमा दर खाने कार्यक्रम मनाएका थिए । सिंहदरबारबाट शुरु भएको दर खाने कार्यक्रम पुल्चोकस्थित मन्त्री क्वाटरमा पुगेको छ ।
विभिन्न जिल्लाहरूमा स्थानीय प्रशासनले तीजको अवसरमा पार्टी प्यालेसहरूमा दर खाने कार्यक्रम नगर्न निर्देशन दिएका छन् ।
तर, स्थानीय प्रशासनहरूको आदेशलाई खिल्ली उडाउने गरेर तीजको दर खाने कार्यक्रम सिंहदरबार र मन्त्री क्वाटरबाट शुरू भएपछि कम्युनिस्ट सरकारका मन्त्रीहरूको आलोचना भएको छ ।
उर्जामन्त्री पुनले तीज आउन सात दिन अगाडि नै मुलुकको केन्द्रीय सचिवालय सिंहदरबारमा मंगलबार नाचगानसहित दर खुवाएका हुन् ।
त्यस दिन सिंहदरबारभित्र उर्जा मन्त्रालयमा सरकारी पोसाकमा आउने महिला कर्मचारी रातो साडीमा सजिएका थिए । ऊर्जा, जलस्रोत तथा सिँचाइमन्त्री पुनद्वारा आयोजना गरिएको तीजको शुभकामना कार्यक्रमले मन्त्रालयको सभाहल खचाखच थियो ।
महिलाले गीत बजाउँदा मन्त्री पुनले देउमा बसेर ताली बजाएर महिलाहरूको नाचगान हेरेका थिए ।
जनयुद्धका बेला तीजमा दर खाएको भन्दै र तडकभडक गरेको भनेर गाउँका सर्वसाधारणलाई भाटे कारबाही गरेका पुनले नै सिंहदरबारभित्र त्यस बेलाको आफ्नै निर्णय पनि भुलेका छन् ।
पर्व आउनु एक महिनाअघिदेखि तीजलाई खर्चिलो र भड्किलो नबनाउन गृह मन्त्रालयले यसअघि जारी गरेको विज्ञप्ति कार्यान्वयनमा आउन सकेको छैन ।
तीजमा ‘बढ्दो विकृति रोक्न’ भन्दै कतिपय जिल्ला प्रशासन कार्यालयले पार्टी प्यालेसमा तीजको दर खाने कार्यक्रम गर्न प्रतिबन्ध लगाएका छन् ।
जिल्ला प्रशासन कार्यालय कास्कीले तीजमा पार्टी प्यालेसमा तीजको दर खाने कार्यक्रम नगर्न सूचना नै जारी गरेको छ ।
तीजको लवाइखवाइ भड्किलो बन्न थालेको भन्दै केही वर्षयता गृह मन्त्रालयले भड्किलो तीज नमनाउन सूचना जारी गर्दै आएको छ ।
गत वर्ष अख्तियार दुरुपयोग अनुसन्धान आयोगले पार्टी प्यालेसमा ५० जनाभन्दा बढी जम्मा भएर दर खाने तथा तीज कार्यक्रम गर्न नपाइने सूचना जारी गरेको थियो । कार्यान्वयन भने हुन सकेन ।
भूमि सुधारमन्त्री अर्याल र उर्जामन्त्री पुनले तीजको दर खुवाउन यति धेरै रकम कहाँबाट ल्याएर खर्च गरेका हुन् हिसाव किताव सार्वजनिक गरेका छैनन् ।
तीज नजिकिँदै गर्दा गरिब जनताले लाउन र खान समस्या भएका समाचार आइरहेका बेला शक्तिशाली कम्युनिस्ट सरकारका मन्त्रीहरूले सिंहदरबार र मन्त्री क्वाटरमै लाखौँ रकम खर्च गरेर हाइप्रोफाइलहरूलाई मात्रै बोलाएर दर खुवाएपछि पार्टीभित्रै आलोचना भएको छ ।
अर्याल र पुनले दर खाने कार्यक्रम सार्वजनिक ठाउँमा गरेर आफ्नै पार्टीका कार्यकर्ताहरूलाई खुवाएको भए यति धेरै आलोचना हुने थिएन ।
तर, उनीहरूले आफ्नो पदीय मर्यादा विपरित सिंहदरबार र मन्त्री क्वाटरभित्र दर खाने कार्यक्रम राखेपछि आलोचना भएको हो ।
फेसबुकबाट तपाईको प्रतिक्रिया