काठमाडौं । संसदमा प्रतिपक्षमा रहेका नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’, नेकपा (एकीकृत समाजवादी)का अध्यक्ष माधवकुमार नेपाल र राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनबीचको भेट भएको छ ।

शुक्रबार सिंहदरबारमा तीन शीर्ष नेताहरूबीच भेट भएको हो । भेटमा सरकारको कामकारबाही र प्रधानमन्त्री केपी ओलीका पछिल्ला अभिव्यक्तिहरूका विषयमा छलफल भएको बुझिएको छ ।

सहकारी ठगका अभियुक्त राष्ट्रिय स्वतन्त्र पार्टी (रास्वपा)का सभापति रवि लामिछाने धरौटीमा छुटेको अर्को दिन संसदमा प्रतिपक्षमा बस्दै आएका ३ दलका शीर्ष नेताहरूको बैठक बसेर भावी रणनीतिमा छलफल गरेका छन् ।

केही दिन अगाडि बसेको नेकपा (एमाले)को केन्द्रीय कमिटीको बैठकमा प्रधानमन्त्री समेत रहेका अध्यक्ष केपी ओलीले दाहाललाई राजावादीसँग साँठगाँठ रहेको आरोप लगाएका थिए । त्यो आरोप सेलाउन नपाउँदै दाहालले राजावादी नेता राप्रपाका अध्यक्ष लिङ्देनसँग भेट गरेका छन् । भेटमा नेकपा (एकीकृत समाजवादी)का अध्यक्ष नेपाललाई पनि साथमा राखेका छन् ।

संविधान संशोधनको विषयलाई लिएर प्रचण्ड, माधव र राजेन्द्रले कांग्रेस र एमालेभित्र विवाद बनाउन विभिन्न हर्कत गर्दै आएका छन् ।

उनीहरूका बीच सहकारी ठगका अभियुक्त रास्वपाका सभापति लामिछाने धरौटीमा रिहा भएको विषयमा पनि कुराकानी भएको बुझिएको छ ।