बुद्धको जहाजमा समस्या देखिएपछि आकस्मिक अवतरण, पाइलटको प्रशंसानीय कार्य

काठमाडौं । प्राविधिक समस्या देखिएपछि बुद्ध एयरको जहाजलाई त्रिभुवन अन्तर्राष्ट्रिय विमानस्थलमा आकस्मिक अवतरण गराइएको छ ।

सोमबार बिहान काठमाडौंबाट भद्रपुरतर्फ यात्रु बोकेर उडेको बुद्ध एयरको जहाजमा प्राविधिक समस्या देखिएपछि काठमाडौं डाइभर्ट गरेर सुरक्षित अवतरण गरिएको विमानस्थलले जनाएको छ । जहाजमा समस्या देखिएपछि पाइलटले कुशलतापूर्वक जहाजलाई सुरक्षित अवतरण गरेर प्रशंसनीय कार्य गरेका छन् ।

जहाजको दायाँ इञ्जिनमा समस्या देखिएको विमानस्थलका एक कर्मचारीले बताए । जहाजलाई भद्रपुर पुग्नुभन्दा पहिला नै बीचबाट काठमाडौं फिर्ता गरिएको छ ।

जहाजलाई अवतरण गराउने क्रममा विमानस्थलमा केही बेर अन्य उडान रोक्नु परेको छ । जहाज अवतरणका क्रममा त्रिभुवन अन्तर्राष्ट्रिय विमानस्थलमा इमर्जेन्सी घोषणा गरिएको थियो ।

Published : Monday, 2025 January 6, 12:02 pm