काठमाडौं । एमालेका नेता महेश बस्नेतको भाउतोमा लागेर तत्कालीन समयमा प्रतिनिधिसभाका सांसद अपहरण गरेको अभियोग लागेका नेपाल प्रहरीका पूर्वआईजीपी समेत रहेका एमाले नेता सर्वेन्द्र खनालले पार्टी छाडेको घोषणा गरेका छन् ।

प्रहरी जीवनबाट अवकास पाउनेवित्तिकै खनाल एमालेमा प्रवेश गरेका थिए । एमालेले खनाललाई विश्वास गरेर दुई पटकसम्म प्रतिनिधिसभाको टिकट दिएको थियो । तर, खनालले जित हासिल गर्न सकेनन् ।

आइतबार सामाजिक सञ्जालमार्फत खनालले आफू कुनै पनि राजनीतिक दलमा नरहेको बताएका छन् । खनाल विवादित छविका व्यक्ति मानिन्छन् । तत्कालीन समयमा काठमाडौं अपराध महाशाखाको प्रमुख रहेका बेला खनालले कुमार घैटेलाई कथित इन्काउन्टरका नाममा गोली हानेर हत्या गरेका थिए । घैटेको इन्काउन्टर गरेको विषयमा प्रतिनिधिसभाको बैठकमा समेत खनालविरुद्ध आवाज उठेको थियो ।

खनालले लेखेका छन्, ‘हजुरहरू मेरो राजनीतिकस्थितिबारे अन्योलमा परेको महसुस गरेर म यसै माध्यमबाट यसलाई स्पष्ट पार्न चाहन्छु कि म अहिले कुनै पनि राजनैतिक पार्टीसँग आवद्ध छैन ।’

‘म स्वतन्त्र रुपमा स्थानीय र राष्ट्रिय समस्याहरूको समाधानका लागि काम गरिरहेको छु’, खनालले भनेका छन्, ‘म देश र समाज हितका लागि आफ्नो समय परिस्थिति अनुकुल सधैं सक्दो कार्यहरु गरिरहनेछु ।’

खनाल २०७९ असोज ६ गते एमाले प्रवेश गरेका थिए । खनाललाई एमालेका अध्यक्ष केपी ओलीले पार्टी प्रवेश गराएका थिए ।

एमाले प्रवेश गरे लगतै खनालले एमालेबाट काठमाडौं क्षेत्र नम्बर ६ बाट प्रतिनिधिसभा सदस्यको टिकट पाएका थिए । खनाल राष्ट्रिय स्वतन्त्र पार्टी (रास्वपा)का शिशिर खनालसँग पराजित भएका थिए ।

त्यसपछि एमालेले खनाललाई पुनः तनहुँमा भएको प्रतिनिधिसभाको उपनिर्वाचनमा टिकट दिएको थियो । तनहुँमा पनि खनाल रास्वपाका स्वर्णिम वाग्लेसँग पराजित भएका थिए ।