वीरगञ्ज । सहकारी ठगका अभियुक्त राष्ट्रिय स्वतन्त्र पार्टी (रास्वपा)का सभापति एवम् पूर्व गृहमन्त्री रवि लामिछानेसहितको गिरोहविरुद्ध पर्सा जिल्लामा पनि पक्राउ पुर्जी जारी भएको छ ।

बुधबार पर्सा जिल्ला अदालतबाट लामिछाने, गोर्खा मिडिया नेटवर्क प्रा.लि.का तत्कालीन उपाध्यक्ष समेत रहेका पूर्व डीआईजी छविलाल जोशीविरुद्ध पक्राउ पुर्जी जारी भएको छ । वीरगञ्जको सानो पाइला सहकारीको बचत अपचलनको विषयमा अनुसन्धान गर्न प्रहरीलाई अदालतले लामिछानेसहितको गिरोहका नाइकेहरूविरुद्ध पक्राउ पुर्जी दिएको छ ।

रास्वपाका सभापति लामिछाने प्रबन्ध निर्देशक रहेका बेला सानो पाइल सहकारीबाट करिब ८ करोड रुपियाँ गोर्खा मिडिया नेटवर्कमा गएको थियो ।

लामिछाने र जोशीविरुद्ध कास्की, रुपन्देही, काठमाडौं र चितवनमा पनि पक्राउ पुर्जी जारी भइ संगठित अपराध, सम्पत्ति शुद्धीकरण, सहकागी ठगीमा अनुसन्धान जारी छ । लामिछाने हाल कास्की प्रहरीको हिरासतमा छन् ।

सानो पाइला सहकारीबाट गोर्खा मिडिया नेटवर्कमा ८ करोडभन्दा बढी रकम प्रवाह भएको देखिएको सहकारी अपचलन सम्बन्धी संसदीय विशेष समितिको प्रतिवेदनमा उल्लेख छ ।

अहिले लामिछानेलाई जिल्ला प्रहरी कार्यालय चितवनमा लगिएको छ । चितवनमा बयान सकेपछि प्रहरीले लामिछानेलाई वीरगन्ज लैजानेछ ।