धनगढी । परराष्ट्रमन्त्री डा. आरजु राणा देउवाले राजनीतिक स्थायित्वका निम्ति दुई ठूला पार्टी मिलेर सरकार निर्माण गरिएको बताएकी छिन् ।

धनगढीमा शनिबार आयोजित कार्यक्रममा डा.राणाले मुलुकको विकासका निम्ति आवश्यक राजनीतिक स्थायित्वका लागि वर्तमान सरकार गठन भएको र सोहीअनुसार अघि बढेको बताइन् ।

उनले वर्तमान सरकारले मुलुकलाई आर्थिक र समाजिक रूपमा कसरी अगाडि बढाउने भन्नेमा ध्यान केन्द्रित गरेको समेत बताएकी छिन् ।

आर्थिक तथा सामाजिक विकासका निम्ति देशमा लगानीको वातावरण बनाउन सरकार क्रियाशील रहेको उनले बताइन् ।

परराष्ट्रमन्त्री डा.राणाले नेपालमा प्रजातन्त्र, लोकतन्त्र स्थापनामा पत्रकारिताजगतको ठूलो योगदान रहेको बताएकी छिन् । उनले नेपाली कांग्रेस सदैव स्वतन्त्र प्रेसको पक्षमा रहेको बताएकी छिन् ।

उनले भनिन, ‘हामीले संविधानको प्रस्तावनामै पनि पूर्ण प्रेस स्वतन्त्रता हुने उल्लेख गरेका छौँ । मौलिक हकमार्फत थप अधिकार सुनिश्चित गरिएको छ ।’

‘यसका लागि संविधान निर्माणको समयमा कांग्रेसले ठूलो भूमिका निर्वाह गरेको छ’, परराष्ट्रमन्त्री डा.राणाले भनिन् ।