काठमाडौं । जिल्ला प्रहरी कार्यालय मकवानपुरले स्रोत नखुलेको ४६ हजार विदेशी मुद्रासहित ३ जना भारतीय नागरिकलाई पक्राउ गरेको छ ।

आइतबार राति विशेष सूचनाको आधारमा प्रहरीले बा.प्र.०३–००१ ज ०७६५ नम्बरको यात्राहक ईभी माईक्रो बसमा खानतलासी गर्दा भारतीय नागरिकको साथमा रहेको विदेशी मुद्रा बरामद गरिएको मकवानपुर प्रहरीका प्रमुख (एसपी) विश्वराज खड्काले बताए ।

बरामद भएको विदेशी मुद्राको सोमबारको बजार भाउ ६२ लाख ९० हजार ३५ रुपियाँ हुने मकवानपुर प्रहरीका एसपी खड्काले बताएका छन् ।

सूचना पाएपछि मकवानपुर प्रहरीका प्रमुख (एसपी) खड्का आफैले प्रहरी टोलीको कमाण्ड गरेर हेटौँडा उपमहानगरपालिका वडा नं. १ प्रहरी चौकी चौकीटोलस्थित चेकपोईन्ट अगाडि हेटौँडा–भैँसे सडकखण्डमा काठमाडौंबाट हेटौँडातर्फ आउँदै गरेको माईक्रो बसमा सवार भई आएका भारतीय नगरिकहरूलाई खानतलासी गरेका थिए ।

तीनजना भारतीय नागरिकको शरीर तथा झोला समेतको खानतलासी भएको थियो । उनीहरूको साथमा रहेको स्रोत नखुलेको विदेशी मुद्रा फेला परेको भन्दै एसपी खड्काले थप अनुसन्धान भइरहेको बताए । आवश्यक कारबाहीको लागि राजश्व अनुसन्धान कार्यालय, पुल्चोक, ललितपुर पठाउने तयारी भइरहेको सोमबार जारी विज्ञप्तिमा उल्लेख छ ।

पक्राउ पर्नेमा भारतको उत्तर प्रदेश जिल्ला जालौन बस्ने वर्ष ४० का विजयसिंङ कुशवाहबाट अमेरिकी डलर १२ हजार बरामद भएको एसपी खड्काले बताए ।

भारतको उत्तर प्रदेश जिल्ला गोरखपुर बस्ने वर्ष २६ को प्रशान्त पाठकको साथबाट युरो १४ हजार र भारतकै राजस्थान चितोरगढ बस्ने वर्ष ३२ को राहुलकुमार माण्डावतको साथबाट अमेरिकी डलर २० हजार बरामद भएको छ ।

यसैबीच, मकवानपुर प्रहरीले १० किलो २ सय ५० ग्राम गाँजासहित २ जनालाई पक्राउ गरेको छ ।
आइतबार दिउँसो विशेष सूचनाको आधारमा मनहरी गाउँपालिका वडा नं.९ भलाद्मीचोकस्थित पूर्वपश्चिम सडक खण्डमा मनहरीबाट हेटौँडातर्फ जाँदै गरेको ना १ ह ५०३३ नम्बरको अटोलाई चेकजाँच गर्ने क्रममा गाँजा बरामद भएको विज्ञप्तिमा उल्लेख छ ।

अटो चालक मनहरी गाउँपालिका वडा नं. ८ बस्ने वर्ष २८ को रामकुमार परियार र सोही अटोमा सवार मनहरी गाउँपालिका वडा नं. ९ बस्ने वर्ष अं.३६ को रामकुमार स्याङबोलाई गाँजासहित पक्राउ गरिएको छ । उनीहरूलाई नियन्त्रणमा लिइ थप अनुसन्धान भइरहेको प्रहरीले जनाएको छ ।