भरतपुर । राष्ट्रिय स्वतन्त्र पार्टी (रास्वपा)का सभापति एवम् पूर्वगृहमन्त्री रवि लामिछानेविरुद्ध जिल्ला प्रहरी कार्यालय चितवनमा किटानी जाहेरी परेको छ ।

बुधबार सहकारीपीडितहरूले साहारा सहकारीको बचत रकम हिनामिना प्रकरणमा बचतकर्ताले रास्वपाका सभापति लामिछाने र पूर्वडीआईजी छविलाल जोशीविरुद्ध प्रहरीमा किटानी जाहेरी दिएका हुन् ।

लामिछानेसहित १० जनाविरुद्ध प्रहरीमा जाहेरी परेको छ । सहकारी संघर्ष पीडितका अध्यक्ष शालिकराम दवाडीले लामिछानेसहित १० जनाविरुद्ध जाहेरी दिएको बताए ।

जिल्ला प्रहरी कार्यालय चितवनका प्रहरी उपरीक्षक (एसपी) गौतम मिश्रले लामिछानेसहितका आरोपीमाथि पूरक अनुसन्धान भइरहेको बताएका छन् ।

यसअघि साहारा सहकारीको बचत रकम हिनामिना प्रकरणमा जीबी राईसहित १७ जनाविरुद्ध मुद्दा दर्ता भएको थियो ।

चितवनमा लामिछानेको निर्वाचन क्षेत्र रहेको छ । लामिछानेले आफ्नै मतदाताहरूले सहकारीमा जम्मा गरेको करोडौं रकम ठगी गरेको प्रकरणमा किटानी जाहेरी परेपछि रास्वपाभित्र हंगामा भएको छ ।