काठमाडौं । नेपाली कांग्रेसको तर्फबाट काठमाडौंको कीर्तिपुर नगरपालिकाको मेयर पदमा कृष्णमान डंगोलले उमेदवारी दर्ता गराएका छन् ।

आइतबार डंगोलले नेता, कार्यकर्ताहरूसँग दलबलसहित पुगेर मनोनयन दर्ता गराएका हुन् । उम्मेदवारी दर्ताका क्रममा कांग्रेसका महामन्त्री विश्वप्रकाश शर्मा, नेताहरू राजन केसी, जीतजंग बस्नेत लगायतको उपस्थिति रहेको थियो ।

०७९ को स्थानीय तह निर्वाचनमा कांग्रेसका तर्फबाट कीर्तिपुरको मेयरमा निर्वाचित राजकुमार नकर्मीको निधन भएपछि उपनिर्वाचन हुन लागेको छ ।

त्यसैगरी, कीर्तिपुर नगरपालिका वडा नं. १ को वडाध्यक्ष पदमा कांग्रेसका इच्छा महर्जनले उमेदवारी दर्ता गराएका छन् । ०७९ को स्थानीय तह निर्वाचनमा कांग्रेसका तर्फबाट वडाध्यक्षमा निर्वाचित हीरालाल महर्जनको निधन भएपछि उपनिर्वाचन हुन लागेको छ ।

कीर्तिपुर नगरपालिकाको वडा नं. ४ को वडाध्यक्ष पदमा कांग्रेसको तर्फबाट राजेन्द्र बानियाँले उमेदवारी दिएका छन् । बानियाँ ०७९ को स्थानीय तह निर्वाचनमा सोही वडाको वडाध्यक्षको उमेदवार बनेर पराजित भएका थिए ।

०७९ को स्थानीय तह निर्वाचनमा स्वतन्त्र उमेदवारी दिएर वडाध्यक्षमा निर्वाचित श्यामकुमार अधिकारीको निधन भएपछि उपनिर्वाचन हुन लागेको छ ।