काठमाडौं । इन्टरपोलबाट रेड नोटिस जारी भएका फरार व्यक्तिलाई नेपाल प्रहरीले कम्बोडियाबाट पक्राउ गरेर काठमाडौं ल्याएको छ ।

वैदेशिक रोजगारी ठगी लगायत मुद्दामा इन्टरपोलबाट रेड नोटिस जारी भएका फरार प्रतिवादी सिन्धुपाल्चोकको मान्खा ठेगाना भएकी बिनु शाक्य पक्राउ परेको आइतबार जारी प्रहरीको विज्ञप्तिमा उल्लेख छ ।

एनसीबी कम्बोडियाको समन्वयमा पक्राउ परेकी शाक्यलाई सम्बन्धित मुद्दामा कारवाही गर्ने÷गराउने प्रयोजनार्थ आइतबार नेपाल फिर्ता ल्याइएको छ ।

वैदेशिक रोजगारीमा सिंगापुर पठाईदिन्छु भनि ४० जनाभन्दा बढी व्यक्तिहरूबाट ५ करोड २ लाख ९४ हजार रूपियाँ ठगी गरी फरार भएका बिनु शाक्य र उदयपुरको त्रियुगा नगरपालिका–१० ठेगाना भएका सुजन आचार्यलाई अन्तर्राष्ट्रियस्तरमा खोजतलास एवम् पक्राउ गर्नको लागि नेपाल प्रहरी प्रधान कार्यालय अपराध अनुसन्धान विभाग इन्टरपोल शाखाले पहल गरेको थियो । प्रहरीको अनुरोध भएपश्चात २०८० माघ १९ गते उनीहरूविरूद्ध रेड नोटिस जारी भएको थियो ।

अन्तर्राष्ट्रियस्तरमा खोजतलास गरी नेपाल फिर्ता ल्याई सम्बन्धित कसूरमा कानूनी कारवाही गराउनको लागि नेपाल प्रहरी प्रधान कार्यालय अपराध अनुसन्धान विभाग इन्टरपोल शाखाबाट इन्टरपोलका सम्पूर्ण सदस्य राष्ट्रहरूलाई पत्राचार गरिएकोमा २०८१ असोज १ गते कम्बोडियाबाट दुवै जनालाई पक्राउ गरिएको प्रहरीले विज्ञप्तिमा उल्लेख गरेको छ ।

पक्राउमध्ये सुजनलाई गत कात्तिक ९ गते नेपाल फिर्ता ल्याइएको थियो । बिनुलाई सम्बन्धित कसूरमा कानून बमोजिम कारवाही गराउने प्रयोजनार्थ प्रहरी वृत्त कालिमाटीमा बुझाइएको छ ।