काठमाडौं । जिल्ला प्रहरी कार्यालय महोत्तरीले लक्ष्मनिया देवीको हत्या अभियोगमा २२ वर्षीय राकेश नायक र उनकी श्रीमती २५ वर्षीया रिनादेवी महरालाई पक्राउ गरेको छ ।

बिहीबार जारी विज्ञप्तिअनुसार प्रहरीले राकेश र रिनालाई कात्तिक १४ गते पक्राउ गरेको जनाएको छ । हत्या भएकी लक्ष्मिनिया राकेशकी जेठी पत्नी हुन् ।

पिपरा गाउँपालिका वडा नं. ७ दनौलीमा अशोक ठाकुरको आँपको बगैचामा कात्तिक १२ गते अनुहारको भाग जलेको अवस्थामा महिलाको शव भेटिएको थियो । प्रहरीको अनुसन्धानका क्रमममा लक्ष्मिनियाको हत्या उनका श्रीमान् राकेश र सौता रिना मिलेर गरेको खुलेका थियो । हत्या पछि राकेश र रिना नेपाल–भारत सिमानाको आसपासमा लुकेर हिँडेका थिए ।

राकेशविरुद्ध लक्ष्मिनियाले प्रहरीमा बहुविवाहमा जोहेरी दिन्छु भनेर धम्की दिएपछि विवाद भएको थियो । कात्तिक ११ गते राति एउटै कोठामा राकेश र रिना तथा हत्या भएकी लक्ष्मिनियाबीच झगडा भएको थियो ।

कात्तिक ११ गते लक्ष्मिनियालाई राकेश र रिनाले मृतक लक्ष्मिनियाको झोलामा रहेको सल निकालेर घाँटी थिचेर हत्या गरेको विज्ञप्तिमा उल्लेख छ ।

लक्ष्मिनियाँले भारत र भैरहवा लगायतका स्थानमा पुगेर ज्याला मजदुरी गरेर जीवन गुजारा गर्दै आएकी थिइन् ।