विदुर । बागमती प्रदेशका मुख्यमन्त्री बहादुरसिंह लामा तामाङले अबको निर्वाचनमा कांग्रेसले बहुमत प्राप्त गर्ने बताएका छन् ।

शनिबार गृहजिल्ला नुवाकोटको विदुरमा आयोजित कार्यक्रममा मुख्यमन्त्री लामाले २०८४ सालको निर्वाचन कांग्रेस एकल बहुमतसहित ठूलो दल हुने बताए ।

कांग्रेसले परिकल्पना गरे अनुसार नै वर्तमान सरकार अगाडि बढिरहेको उनले बताएका छन् । उनले कांग्रेसले जनताको विकासमा पहिलो प्राथमिकता दिने बताए ।

मुख्यमन्त्री लामाले कांग्रेसको समाजवाद अनुसार हरेक नागरिकले स्वास्थ्य, शिक्षा, रोजगारी सिर्जना गरेर देशलाई विकासको बाटोमा लाने भएकाले वर्तमान सरकार त्यसको आधारमा नै अघि बढिरहेको बताएका छन् ।

मुख्य कुरा देश विकासका लागि रोजगारी सिर्जना गर्नुपर्ने भन्दै लामाले त्यसका लागि कलकारखाना तथा उद्योगहरू खोल्नुपर्ने बताएका छन् ।
मुख्यमन्त्री लामाले आफू बागमतीको आर्थिक मामिला मन्त्री भएका बेला ७ अर्ब बजेट ल्याउन सफल भएको बताएका छन् ।

‘म आर्थिक मामिला मन्त्री भएका बेला नुवाकोटमा ७ अर्ब बजेट ल्याएको थिए । अझै बजेट आएन भनेर विरोध भयो’, मुख्यमन्त्री लामाले भने, ‘आफ्नोमा पैसा नपरेपछि विरोध हुने, सबैले मेरो होइन हाम्रो भन्न सक्यौं भने मात्रै विकास गर्न सकिन्छ ।’