लुम्बिनी । श्रीलंकाका पूर्व राष्ट्रपति गोटावाया राजापाक्षलाई लुम्बिनी विकास कोषले स्वागत गरेको छ ।

शुक्रबार लुम्बिनीमा कोषका उपाध्यक्ष डा. ल्हारक्याल लामा (खेन्पो छिमे)ले पूर्व राष्ट्रपतिलाई स्वागत गरेका हुन् । डा.लामाले श्रीलंकासँग नेपालको सम्बन्ध निकै पूरानो रहेको बताउँदै बुद्धजन्मस्थल लुम्बिनीले त्यो सम्बन्ध अझ प्रगाढ बनाएको बताए ।

डा.लामाले लुम्बिनी क्षेत्रमा शाक्यमुनी बुद्धसँगै कक्रुछन्द र कनकमणि गरी तीन वटा बुद्धको जन्म भएकाले निकै महत्वपूर्ण स्थल रहेको बताए ।

लुम्बिनीसँग श्रीलंकाको सम्बन्ध पनि निकै पूरानो रहेकाले लुम्बिनीको विकासमा सहकार्य गर्न सधै तयार रहेको डा.लामाले बताएका छन् ।

कोषका उपाध्यक्ष डा.लामाले लुम्बिनीलाई लक्षित गरी गौतमबुद्ध विमानस्थलमा नियमित उडानका लागि श्रीलंकासँग आग्रह गरेका छन् ।

राजापाक्षेसँगै श्रीलंकाका लागि नेपाली राजदूत सुदर्शना पाथिराना समेत सहभागी थिए ।

पूर्वराष्ट्रपति राजापाक्षेत्रलाई कोषका कोषाध्यक्ष ढुण्डिराज भट्टराई, सदस्य सचिव सानुराजा शाक्य, योजना प्रमुख स्मिता भट्ट, वरिष्ठ निर्देशक ज्ञानिन् राई लगायतका कर्मचारीहरूले स्वागत गरेका छन् ।

वरिष्ठ निर्देशक ज्ञानिन् राईले श्रीलंकन मन्दिरको पुनःनिर्माणका लागि अनुरोध गरेका छन् । स्वागत कार्यक्रमपछि पूर्वराष्ट्रपति राजापाक्षेले मायादेवी भ्रमण गरेका छन् ।

श्रीलंकाका नागरिकहरू लुम्बिनीमा श्रद्धाका साथ आउने भएकाले पूर्व राष्ट्रपतिले महत्वका साथ मायादेवी भ्रमण गरेको सूचना तथा जनसम्पर्क प्रमुख डा. हरिध्वज राईले बताए ।

परिवारसहित आएका राजापाक्षेले लुम्बिनीमा शान्तिको कामना गर्दै दीप प्रज्वलन समेत गरेका छन् ।

शुक्रबार अपरान्ह लुम्बिनी आइपुगेका श्रीलंकाका पूर्व राष्ट्रपति गोटावाया राजापाक्षे झरीको प्रवाह नगरी मायादेवीको श्रद्धाभक्तिका साथ दर्शन गरेका छन् ।

निरन्तरको वर्षाले हिंडडुल गर्न समेत असहज भएको बेला पूर्वराष्ट्रपति राजापाक्षेले बुद्धजन्मस्थल लुम्बिनीमा पाईला टेक्न पाउनु जीवनकै ठूलो उपलब्धी भएको बताएका छन् ।

श्रीलंकाका पूर्वराष्ट्रपति राजापाक्षेले मायादेवी मन्दिर, जन्मस्मारक शिला, मायादेवी मूर्ति, पुष्पकरणी पोखरी, अशोकस्तम्भका बारेमा जानकारी लिएका छन् ।