परराष्ट्रमन्त्री डा.राणा र रोमानियाकी विदेशमन्त्री लुमिनिताबीच भेटवार्ता

काठमाडौं । परराष्ट्रमन्त्री डा. आरजु राणा देउवा र रोमानियाकी विदेशमन्त्री लुमिनिता ओडोबेस्कुबीच भेटवार्ता भएको छ ।

शुक्रबार क्यानडाको टोरन्टोमा डा.राणा र लुमिनिताबीच द्विपक्षीय वार्ता भएको हो । नेपाल र रोमानिया सम्बन्ध तथा दुई देशबीचको आपसी हितका विविध विषयमा कुराकानी भएको परराष्ट्रमन्त्री डा.राणाको निजी सचिवालयले जनाएको छ ।

क्यानडाको टोरन्टोमा आयोजित महिला विदेशमन्त्रीहरूको बैठकमा सहभागी हुने क्रममा परराष्ट्रमन्त्री डा. राणा क्यानडा गएकी थिइन् ।

नेपालमा हाइड्रोपावरलगायत विभिन्न क्षेत्रमा लगानीका लागि परराष्ट्रमन्त्री डा. राणाले लुमिनितामार्फत रोमानियाली सरकार र त्यहाँका लगानीकर्ताहरूलाई आग्रह गरेकी छिन् ।

रोमानियाली विदेशमन्त्री लुमिनिताले नेपालमा जलस्रोत व्यवस्थापन, पर्यटन र शिक्षाका क्षेत्रमा काम गर्न सकिने गरी चासो देखाएकी छिन् ।

Published : Saturday, 2024 September 21, 10:25 pm