काठमाडौं । सहकारीको करोडौं रकम अपचलन, हिनामिना र ठगी काण्डमा परेर फरार रहेका गोर्खा मिडिया नेटवर्क प्रालिका अध्यक्ष गितेन्द्रबाबु राई (जीबी राई)लाई सरकारले पक्राउ गरेर सार्वजनिक गर्ने तयारी गरेको छ ।

सरकारले कुनै पनि हालतमा पक्राउ गर्ने गृहकार्य गरेको चलपाएपछि राईले नेपाल सरकारसामु आफै आत्मसमर्पण गर्ने तयारी गरेको निकटका व्यक्तिहरुले बताएका छन् । राईका पार्टनर समेत रहेका गोर्खा मिडिया नेटवर्क प्रालिका तत्कालीन प्रबन्ध निर्देशक रवि लामिछानेले सहकारीको रकम ठगीको जिम्मेवारी राईलाई मात्रै दिएका छन् । राई र लामिछाने मिलेर सहकारीको रकम ठगी गरेको आरोप लाग्दै आएको छ ।

सहकारीको रकम अपचलन र ठगी विषयमा छानविन गर्न बनेको संसदीय छानविन समितिले आफ्नो कामलाई अन्तिम चरणमा लगेका बेला राईले आफूलाई सार्वजनिक गरेर सत्यतथ्य बाहिर ल्याउनुपर्छ । राईले आफूलाई प्रहरीसामु आत्मसमर्पण गरेर लामिछानेको भण्डाफोर गर्नुपर्ने सुझाव आएको छ । राई फस्ने भएपछि लामिछाने बच्दा फाइदा र बेफाइदा कसलाई हुन्छ प्रष्ट नै छ । अन्यथा राई फस्ने लामिछाने बच्ने सम्भावना समेत आउन सक्छ ।

मलेसियामा लुकेर बसेका राईलाई तत्कालीन समयमा पक्राउ गर्ने तयारीहरु भएका थिए । रवि लामिछाने गृहमन्त्री बनेर आएपछि राईलाई पक्राउ गर्ने भनेर सूचनाहरु सार्वजनिक मिडियामा भनेपछि राईलाई पक्राउ गर्ने कार्य बिथोलिएको थियो ।
गोर्खा मिडिया नेटवर्क प्रालिका तत्कालीन प्रबन्ध निर्देशक लामिछाने गृहमन्त्री बनेपछि सहकारीको रकम ठगी काण्डलाई दवाउन खोजेका थिए । अनुसन्धानमा खटिएका प्रहरीको सरुवा गर्नेदेखि थर्काउने लगायतका कार्य भएका थिए ।

लामिछाने पनि सहकारीको ठगी काण्डबाट पक्राउ पर्ने सम्भावना छ । उनी पक्राउ पर्ने भएपछि प्रधानमन्त्री केपी ओली र नेपाली कांग्रेसका सभापति शेरबहादुर देउवालाई भेटेर बचाउन अनुरोध गरिसकेका छन् ।

आफै प्रबन्ध निर्देशक भएको कम्पनीमा सहकारीको रकम आएको थाहा छैन भन्ने लामिछानेले राजनीतिक शक्ति लगाएर बच्ने प्रयास गरिरहेका छन् । उनका गतिविधिले गर्दा सबैभन्दा नोक्सानी राई र सहकारीका पीडितहरुलाई भइरहेको छ । राईलाई पक्राउ गर्न सरकारले कुटनैतिक प्रयासहरु गरेको स्रोतको भनाइ छ ।