निर्णायक पदहरुमा महिलाका लागि निश्चित सीमा तोक्नुपर्छ : परराष्ट्रमन्त्री डा.राणा

काठमाडौं । परराष्ट्रमन्त्री डा. आरजु राणा देउवाले राजदूत नियुक्तिलाई समावेशी बनाइने प्रतिबद्धता जनाएकी छिन् ।

सिंहदरबारमा सोमबार बसेको संसदीय सुनुवाइ समितिको बैठकमा डा.राणाले दलित र मुस्लिम समुदायबाट खोजे पनि सम्भव नभएको बताएकी छिन् । उनले आगामी दिनमा राजदूत सिफारिस गर्दा समावेशी बनाउने प्रतिबद्धता जनाएकी छिन् ।

परराष्ट्रमन्त्री डा.राणाले भनिन्, ‘जति समावेशी हुनुपर्थ्यो, समानुपातिक हुनुपर्थ्यो त्यो हुनसकेको छैन भन्ने मलाई पनि लागेको छ । यो कुरा मन्त्रिपरिषदमा म अघि बढाउनेछु ।’

निर्णायक पदहरुमा महिलाका लागि निश्चित सीमा तोक्नुपर्ने उनले बताएकी छिन् । डा.राणाले मन्त्रिपरिषदमा दुई जना महिला मात्र रहेको बताएकी छिन् ।

‘यहाँ (राजदूत सिफारिस) पनि १७ जनामा दुई जना देखापर्नुभएको छ’, डा.राणाले भनेकी छिन् ।

Published : Monday, 2024 September 9, 6:27 pm