न्युयोर्क । अमेरिकामा नेपाली मूलकी २१ वर्षीया युवती मुना पाण्डेको गोली हानी हत्या भएको छ ।

अमेरिकाको स्थानीय समयअनुसार सोमबार ह्युस्टनस्थित अपार्टमेण्टमा गोली लागेर मृत अवस्थामा पाण्डे फेला परेकी थिइन् । हत्याराले पाण्डेको कोठाभित्रै प्रवेश गरी गोली हानेको प्रारम्भीक अनुसन्धानबाट पुष्टि भएको छ । नेपालमा पाण्डे भाेजपुर निवासी हुन् ।

वेष्ट एअरपोर्ट ब्लुभर्डमा रहेको मुनाको अपार्टमेण्टमा पाण्डे आफैँले राखेको सर्भिलेन्स क्यामेराका भिडियो फुटेजहरू प्रहरीले लगिसकेको छ ।

पाण्डे अमेरिकी युवकसँग डेटिङ्गमा रहेको प्रहरीको प्रारम्भीक अनुसन्धानबाट खुलेको छ । पाण्डेको हत्यारा पत्ता लागेको छैन ।

हत्याराले पाण्डेको ओछ्यानमै पुगेर गोली हानेको भिडियो सार्वजनिक भएको छ । सार्वजनिक भएको भिडियोमा पाण्डेलाई तीनवटा गोली हानिएको छ ।

मुना सन् २०२१ मा अध्ययनका लागि अमेरिका आएकी थिइन् । पाण्डेको नेपालमा आमा मात्र रहेको बताइएको छ ।