काठमाडौं । नेपाली कांग्रेसकी केन्द्रीय सदस्य समेत रहेकी परराष्ट्रमन्त्री डा.आरजु राणा देउवाले कांग्रेसभित्र अनुशासनको आवश्यक्ता रहेको बताएकी छिन् ।

शुक्रबार वीपीनगर, ललितपुरमा बसेको केन्द्रीय कार्यसमितिको बैठकमा बोल्ने क्रममा डा.राणाले कुनै पनि संगठन राम्रो बनाउनका लागि अनुशासन आवश्यक पर्ने बताइन् । डा.राणालाई उदृत गर्दै स्रोतले भन्यो, ‘अनुशासन आवश्यक पर्छ । अनुशासन भएन भने त्यो संगठन कहिल्यै पनि अगाडि बढ्न सक्दैन ।’

उनले भनिन्, ‘कसैलाई कोही मन नपर्ने हुन्छ, कोहीलाई अर्को कोही मन नपर्ने हुन्छ । यसले गर्दा पार्टीलाई ठूलो क्षति भएको छ ।’

‘एक्जिट पोलले ११० सिट जित्ने थियो । पार्टीको अन्तर्घातले हारेका हौँ’, उनले भनिन्, ‘पार्टीको अनुशासन भनेको कसैलाई निकाल्ने पनि होइन । झुण्ड्याउने पनि होइन ।’

‘अनुशासन भएन भने पार्टी झन् धराशायी भएर जान्छ’, केन्द्रीय सदस्य समेत रहेकी परराष्ट्रमन्त्री डा.राणाले भनेकी छिन् ।

केन्द्रीय सदस्य डा.राणाले महिलाहरूलाई पार्टीको हरेक निकायमा पदाधिकारीमा राख्ने व्यवस्थाका लागि कांग्रेसले नेतृत्वदायी भूमिका खेल्नुपर्ने बताएकी छिन् । उनले कांग्रेसले नै नेतृत्व गरेर महिलाहरूलाई अगाडि बढाउनुपर्ने बताएको स्रोतले जनाएको छ ।